Ym don kum ki projek ki kam pynroi la baheh ne barit eh, hynrei ka wanrah jingkylla ba khraw: Conrad

Shillong, Nohprah 17: U Myntri Rangbah ka jylla u Conrad K Sangma, mynta ka sngi u la plie paidbah ia ka jingpynitynnad bad pynbha briew ia ka sor (City Beautification Drive) ha Mawlai Maroh.
Haba kren ha kane ka jingialang, u Conrad K Sangma, u la ong ba kane ka jingpyn bha briew ia ka sor ka dei ka jingbteng ia ka jingpyrshang ka sorkar lyngba ka tnad pynroi sor bad ka Municipal ban pynlong ia ki sor bad ki nongbah jong ka jylla kiba khuid ba suba bad kaba jyrngam, kiba bit ba biang bad kiba itynnad.
“Nga dap da ka jingkmen ban ïohi ba ka jingpyrshang jong ngi ki ïaid ha ka lynti kaba dei da ka jingïashim bynta shitrhem bha jong ki paidbah bad ki shnong ki thaw,” u la ong.
Ha phai bad ki jingialang bapher bapher jong ka sorkar bad ki Rangbah Shnongs bad baroh kiba ia don bynta jong ka imlang ka sahlang halor ka project ban itynnad ia ka sor, ha kaba shibun ki shnong kila pynsngew ia ka jingdonkam ban don ki CCTV ha man ki shnong, u myntri rangbah u la ong, “Kum ka jingbuddien ïa kata ka jingïalang nga sngewkmen ban pyntip ba ia ki kor CCTV la dep ban plie paidbah bad napdeng ki 45 tylli ki shnong kiba la shah jied ha ka thup ba nyngkong ki don kumba 25 tylli ki shnong kiba la dep pyndait bad sa kiwei pat ki 20 tylli ki shnong yn sa pyndep noh shen.” U la pyntip ruh ba ka jingpyndait ia ki CCTV bad ki street light ka dei ka kam kaba bteng bad kin don shuh shuh ki shnong na ka bynta ka wat kaba ae.
Shuh shuh u Myntri Rangbah u la ong ba ka long kaba donkam bha kum ki shnong ki thaw bad ka sorkar ban ia trei lang ryngkat ban wanrah ia ka ia ka jingkylla kaba lah ban iohi. “Ym don kum ka projek ki kam pynroi kaba rit ne kaba heh bad wat ka jingkylla kaba rit eh ruh kaba ngi leh ka lah ban wanrah ia ka jingkylla kaba khraw”, u la ong.
U Myntri Rangbah ka Jylla ula sam ruh ïa ki Beautification Grants sha ki shnong bad u la plie ruh ïa ka jingpyndait ne jaka ba buh ia ki CCTV na ka bynta ka shnong Mawlai Mawroh.Hadien kata, u la leit ruh sha Mawlai Iewrynghep.
Ha kane ka sngi ba plie paidbah ia ka project pynitynnad sor la don lang ruh u Chief Secretary, u Dr Shakil P Ahammad bad u Director, Urban Affairs bad CEO, ka Shillong Municipal Board, u P K Boro.