Ym don jingtip ki Waheh Shnong halor ka jingpynmih khubor ka Synjuk Waheh Shnong Ri Jaiñtia

Khliehriat jymmang 31: Ki Waheh Shnong kina na ka thaiñ Narpuh, East Jaiñtia Hills District, ki ai ka jingkyrshan ba pura ïa u bah Ardent.M.Basa-iawmoit, uba ieng rangbah ban ïakhih pyrshah halor ka mat ban pynthymmai noh ïa ka bhah thungkam hapoh ka jylla, ka Reservation Policy kaba la i donkam shisha ban pynkylla noh katkum ka jingkylla ka por.
Ki Waheh Shnong kiba ai ka jingkyrshan ïa ka jingïakhi u bah Ardent, ki kynthup u Waheh Shnong Umkiang, u bah Lasting Pala, Waheh Shnong Dona Skur, u bah Jenisal Pohkyrnu, Waheh Shnong Pyrtakuna, u bah Love You Bareh, Waheh Shnong Kuliang, u bah Min Lamare, Waheh Shnong Borsara, u bah Sharai Lamare,Waheh Sonapyrdi, u bah Edimon Lamare
U Waheh Shnong Lumphyllut, u bah Fantin Pajat ,Waheh Shnong Ratacherra, u bah Pynkhlain Dhar, Waheh Shnong Dona Umbluh, Wol Tariang, Waheh Shnong Umstain, u bah Robi Suchiang bad u Waheh Shnong Lahalein, u bah Mit Dkhar, ki la kubur ruh ba kane ka jingïakhi ka long kaba don nongrim na ka bynta ka jingbha jong ka lawei ki khun ki kti jong baroh ki khun ka bri u Hynñiewtrep.
Kitei ki Waheh Shnong ki la pynpaw ruh ba ki la long kiba la khreh wat ban ïa mih ha kano kano ka por ruh bad ong ruh ba “Lada long kumno kumno ruh, ngin ai jingkyrshan pura ïa u Bah Ardent nangne shakhmat, ha kaba ïadei bad kane ka bhah thung kam thung jam hapoh ka jylla bad lada jia ban hap ban ïa mih ruh, ngin ïa mih paitbah ngi ruh ha kano kano ka por”
Ha kajuh ka por, kitei ki Waheh Shnong napoh ka elaka Narpuh ki la pynpaw ruh ba kim don jingtip eiei halor ka jingpynmih khubor ka Synjuk Waheh Shnong Ri Jaiñtia, kumto kumba la paw ha ki pathai khubor bad ong ruh ba kim don satia kano kano ka jingmut ban pharia ïa ka jaitbynriew, hynrei ki kwah ba kum ka jaitbynriew dei ban ïa long shitylli lang kawei kumba ong ka ktien “Khynriam u Pnar u Bhoi u War, u dei u paid Khasi ba ïar”.
Ha ka juh ka por, ki Waheh Chnong ka thaiñ Ïooksi Saphai, hadien ba ka Synjuk Ki Waheh Chnong Ri Jaiñtia haba ka ki la dawa bhah kyrpang da 20% na bynta ki Jaiñtia na ka State Job Reservation Policy.
Haba ïadei bad kane na ka liang ki Waheh Chnong ka thaiñ Ïooksi Saphai, ki la pynpaw ïa ka jingbym don jingtip eiei ïa katei ka jingdawa hynrei na ka liang jong ki ki ai ka jingkyrshan kaba pura ïa u Bah Ardent M Basaïawmoit ha kaba ïadei bad ka jingdawa ban pynthymmai ( Review) ïa ka State Job Reservation Policy.
“Kane kamdei shuh ka por jong ka jingïa sngewpher thaiñ, ne ka jingïapharia ïa ka Jaitbynriew, hynrei ka dei ka por jong ka jingïatylli naka bynta ban ïakhun ïa ki jingeh jong ka Jaitbynriew. Ka kyrteng Jaiñtia kam dei ka kyrteng ka Jaitbynriew, hynrei ka dei tang ka kyrteng ka thaiñ, bad ngi dei ban sngewthuh ruh ba ha Jaiñtia la kynthup lang ïa baroh kiwei pat ki Jaitbynriew kum ki Biate, ki Karbi bad kiwei kiwei bad ngim lah ruh ban kyntait dalei lei ruh ïa ki kum ki Nong Jaiñtia ba pura,” ong ka kyrwoh.
“Ngi la mad ïa ka jingshah pharia ha ki por ka sorkar Phareng ha kaba ki la pyndonkam ïa ka Divide and Rule Policy ne Phari bad Synshar na ka bynta ban pharia ïa ka Jaitbynriew. Hynrei ka jingthmu jong u Phareng, kam lah ban pharia ïa ka Jaitbynriew namar ngi don ïa ka jingkhein kur kaba shkem bad kaba don nongrim namar ki Phareng kim lah ban pynïakhlad ïa ka jingïadei kur hapdeng ki Chalam na Pnar, ki Shabong na Khynriam bad ki Mukhim na War, nangta ki Laloo na Pnar, ki Lamin na War bad ki Diengdoh na Khynriam ruh ki dang dei shikur, bun kiwei kiwei ki Kur kiba na kylleng ki thaiñ ka Bri U Hynniewtrep kiba dang ïadei shikur. Ym juh don koit ki kur na ki Jaitbynriew Biate kiba la shong la sah ha Jaiñtia Hills kiba dang ïadei shi kur bad ki Pnar, bad kumjuh ruh, ymjuh don koit ki kur na ka Jaitbynriew Karbi, kiba dang ïadei shikur bad ki Bhoi wat la ki sah makna hapoh ka Ri Bhoi District. Kumta kum ka Jaitbynriew, ngim dei shuh ban pdiang ïa ka jingshah pharia ha ki Nongwei nongar kiba thmu ban pynïapher hapdeng jong ngi kum ka Jaitbynriew,” u la bynrap.
“Khatduh khatwai ki Waheh Chnong ka thaiñ Ïooksi Saphai, ki la kitbok kitrwiang ruh ïa u Bah Ardent Miller Basaïawmoit ba un nang ïoh ïa ka met kaba shait ba khlaiñ bad kumjuh ruh ïa baroh ki paidbah ka Bri U Hynniewtrep hi, kyrmen ba kane ka jingdawa jong ka Jaitbynriew kan sa urlong khlempep shisien ka sngi da ka jingdon ryngkat U Blei ïa ngi kum ka Jaitbynriew,” pynkut ka kyrwoh ba la soi kyrteng da u Nangaibormi Sutnga Waheh Chnong Umdeinlin Ïooksi, u Ma Leonard Rabon Waheh Chnong Ïooksi Kyanmynsar, u Ma Gino Synnah Waheh Chnong Saphai, u Ma Clement Pala Waheh Chnong Ïawthymmei, u Ma Watsing Papeng Waheh Chnong Nongryngkoh, u MaChesnal Manar Waheh Chnong Pohkseh. u Ma Siworning Sayoo Waheh Chnong Madanrwai, u Ma Histokrist Pachiang Waheh Chnong Ïooksi Ïapkhla, u Ma Kyrshan Chullet Waheh Chnong Priang Ïooksi, u Ma Deilang Wahlang Waheh Chnong Sarhen, u Ma Hamran Lyngdoh Waheh Chnong Ïooksi Tongkiad.