Shillong, Lber 30: Ka Khasi Hills Autonomous District Council (KHADC) kam don jingtip eiei halor ka pisa kaba dei ka khajna ba la lum da ka sorkar jylla bad kiba ka dei ruh ban ïoh bhah bynta lang, pynpaw ka kaiphod Comptroller and Auditor General of India (CAG) kaba kut ha ka 31 tarik u lber, 2020.
“Ha ka jingshisha kam don ka rukom treikam kaba la buh ban pynthikna ba ka pisa kaba dei ka khajna halor ki minor mineral bad ki khajna halor ki kali la pyllait da ka sorkar jylla kaba dei ruh ban pyllait ha ka por ba la buh,” ïathuh ka kaiphod CAG.
Katkum ka kaiphod ka jingïohpdiang ïa ka khajna hapoh ki Mines & Minerals (share of royalty) bad ki khajna halor ki kali ba la ïohpdiang na ka sorkar jylla ka la hiar da 93.27 per cent bad 100 per cent haba nujor ha ki snem ba la leit na ka daw ka jingbym ïohpdiang ïa ka bhah na ka sorkar jylla.
Na ka liang ka kaiphod CAG ka la banjur ba ka sorkar jylla bad ka KHADC ki donkam ban buh ïa ki mat treikam khnang ban lah ban kyntiew ïa ka jingïoh lum khajna kaba dei hok ban ïoh la ka dei ban pyllait sha ka Council.
