Ym don jingthmu shuh ka sorkar ban dang pynim biang ia ka Kynshi Power Project Stage-1: Mondal

Shillong, Nailar 20: Ka Joint Committee of Local People on Kynshi Hydro Power Project (JCLPKHPP), ha ka kyrwoh khubor ka la kyntu ïa ka Sorkar Jylla ban pyntip lem la ka don ne em ka jingthmu ban pynim biang ïa ka Kynshi Hydro Power Project stage-I (KHPPS-1).
Lyngba ka shithi ba la phah sha u Myntri ka tnat bording u Abu Taher Mondal ha ka sngi Ba-ar, u Chairman ka JCLPKHPP Roshem Myrthong ula ong, “Lyngba kane ka shithi ngi kwah ban pan jingtip la ka don ne em kano kano ka jingthmu hadien habud ban pynim ïa ka Kynshi Hydro Power Project”.
Ha ka shithi u la pyntip ba ka Committee ka la phah ïa ka shithi ba 8 tarik Lber, 2024 sha u Myntri Rangbah ka Jylla Meghalaya ba pyntip halor ka jingsahnud halor ka jingbym pyntrei ïa ki kam kiba dei jong ka power project.
“Ngi, ki dkhot jong ka Joint Committee, ngi la apkhmih lynti bha ïa ka jingsdang noh jong kane ka project, kaba, kumba ngi la kdew ha ka shithi ba 8 tarik Lber, 2024, ba la pynslem. Namar ka la ïaid katto katne por naduh ba ngi phah ïa ka shithi ba khatduh, la kyrmen ba ka la don kaei kaei ha ka jingthmu lada don ban pynim pat ïa kane ka project,” ong u Bah Myrthong.
Halor kane ka shithi na ka liang u Myntri ka tnad pynmih bording ka jylla u Abu Taher Mondal u la kren shai mynta ka sngi Ba Ar ba ka sorkar kam don shuh kano kano ka jingthmu ban dang pynim biang ïa ka Kynshi Power Project Stage 1 hynrei ki jingpynkhreh ki dang ïaid ban pyntrei ïa ki katto katne ki Power Project ha shi lynter ka wah Kynshi.
U la ïathuh ïa kane hadien ka jingïakynduh bad ki dkhot ka Joint Committee of Local People on Kynshi Hydro Power Project (JCLPKHPP) kiba la leit ban pan jingpynshai na u halor ka jingthmu jong ka sorkar halor kane ka Power Project.
“ Nga la ïathuh ïa ki ba kumba long ïa mynta hi kam don shuh kano kano ka jingthmu ban dang pynim ïa kane ka projek hynrei ka jingpynkhreh ka dang ïaid ban tei da kiwei ki power project ha ka wah Kynshi” ong u Mondal haba ïakren bad ki lad pathai khubor.
U la ïathuh ruh ba ki dkhot ka JCLPKHPP ki la ai ka jingkular ban ai ka jingïatrei lang bad ka sorkar halor kane ka kam.
“ Ka jingïakren jong ngi ka long kaba seisoh bha bad ngi kyrmen ba yn sa lah ban sdang noh da kiwei ki power project ha ka wah Kynshi” ong biang u Mondal.
ïa ka Kynshi Power Project Stage 1 la pyndam noh da ka sorkar naduh ka 12 tarik Nailur 2023 hadien ba la bishar bniah bad lap ba ka lada pyntrei ïa katei ka project ka la rem dor palat pud.
ïa ka Kynshi Stage I la ïasoi soskular bad ka kompani pynmih bording naduh u snem 2007.