Ym don jingthmu ka sorkar ban shna ki jingtei kiba neh shyrta hapoh Lumpongdeng: Conrad Sangma

Shillong, Ïaïong 09: U Myntri ka Jylla u Conrad Sangma u la pynshai sha ki paidbah ha kaba ïadei bad ki jingsngewkhia jong ki haba ïadei bad ki jingtei hapoh ka Dewlynnong Lumpongdeng kaba don hapoh Umïam.
Lyngba ka Video u Myntri Rangbah u la ong ba katkum ka jingïamynjur jong ka sorkar bad ka tnat ki Kam Jngohkai Pyrthei ka long ba kam dei ban don kano kano ka jingtei kaba neh shyrta (permanent infrastructure) hapoh ka Dewlynnong Lumpongdeng, hynrei kin long tang kum ki jingtei kiba la leh hapoh Wards Lake kiba lah ban wengnoh ha kano kano ka por bad kum kine ki jingtei kin ym don jingktah ïa ka jingjyrngam ne ïa ki jingthung jingtep kiba pynitynnad ïa ka mariang ha katei ka jaka.
U la ong ruh hynrei ba ki jingtei kum ki pandal, ki shamelanas, bad ki dukan ba shipor kiba lah ban wengnoh ne pynpra noh shisien ba la pynkutnoh ïa ka prokram kumba la long ha Wards Lake, kum kine ki jingtei kiba lah ban shah kiba lah ban don tang hapoh ki shiphew sngi ne tang da ka taïew bad kumta kan ym don ka jingktah ïa ka Dewlynnong ne ïa baroh kawei ka jinglong jyrngam jong ka jaka.
“Kumta nga kwah ban pynshai ba ym donkam ban don kano kano ka jingsngewkhia kaba khraw, naba ki lah ban don ki riew shimet kiba lah ban ïalam bakla ba la ong ba ka don ka jingmynjur bantei ïa ki jingtei, naba kane kan hap hapoh ka jingpeit jingai jingbit jong ka tnat ki Kam khlaw jong ka sorkar jylla kaba mut ba lada la ai ka jingbit ruh kan dei na ka tnat ki Kam Khlaw kaba long ruh katkum ki kyndon kiba bniah bad ban shim ïa kane sha ka jingpyrkhat, ym don kano kano ka jingailad ban don kano kano ka jingtei bad na ka liang ka tnat ki Kam Jngohkai pyrthei ruh kan ym shah ban don kano kano ka jingtei kaba neh shyrta ha kane ka Dewlynnong,” bynrap u Myntri Rangbah ka jylla.