Shillong, Jylliew 8 : Ka sorkar jylla kam don jingthmu satia ban khang ïa ki skul kiba duna ki khynnah skul ban pule.
Wat la ki don haduh 200 tylli ki Lower bad Upper Primary School haka jylla kiba ki khynnah skul ki don tang hapoh ka 10 ngut, hynrei ka sorkar kam kwah ban khang ne pynduh ïa ka hok jong ki khynnah skul, ong u Myntri ka tnad pule puthi u ma Lahkmen Rymbui.
“ Hooid ha kaba sdang ka don ka jingthmu ban leh kumta hynrei haba ngi la bishar bniah bha ngi shem ban shim ïa kum kane ka rai ka long kum ka jingpynduh bad jingknieh ïa ka hok jong kito pat kiba pule ha kine ki skul” ong biang u ma Rymbui.
U la ïathuh ba ka sorkar Assam lyngba u myntri ka tnad pule puthi jongka u Ranoj Pegu ka la pynbna ban khang ïa 800 tylli ki skul kiba don ki khynnah skul hapoh 30 ngut.
Hynrei ha kaba ïadei bad ka Meghalaya u la ong namar ba don kane ka khlam na kata ka daw na ka liang ka sorkar kan hap ban da bishar bniah shwa ban shim ïa kino kino ki rai namar kam kwah ba ki khynnah kin duh ïa ki jingpule jongki.
Shwa ban wan kane ka khlam COVID-19 ka la don shisha ka jingpynkrheh na ka tnad pule puthi ban rah hakhmat ka kynhun myntri ban khang ïaki skul ba duna ki khynnah skul hynrei da ka jingwan kane ka khlam kaba la ktah jur ïa baroh wat haduh ka pule puthi kumta ka sorkar ka la rai ban pynsangeh noh ïa kane ka jingthmu namar kat kum ki kyndon jongka Right to Education (RTE) Act ruh kala kren shai ba ym bit da lei lei ruh ban pynduh ïa ka hok leit skul jong u ne ka khynnah.
