Ym don jingpyrshah, 500 klur mang ka Sorkar ban pynheh 10500 sq. meter ïa ka kad liengsuiñ ha Umroi

Nongpoh, Risaw, 07: Ka Meghalaya State Pollution Control Board (MSPCB) ha ka sngi Baar ka la pynlong ïa ka jingpynsngew paidbah ha Umroi halor ka jingthmu ban pynheh ïa ka Shillong Airport Umroi kaba ka jingheh jong ka mynta ka don kumba 5000 square meter. bad ban sa pynheh pat sa kumba 5500 square meter bad haba kheiñ kyllum ka jingheh baroh kan long kumba 10500 square meter kynthup ïa ka jaka kaba rim bad kaba thymmai.
Ka jingmang pisa na ka bynta ka jingpynheh ïa ka kad liengsuiñ ka long kumba T.500 klur.
Ha kane ka jingpynsngew paidbah bun na ki nongshong shnong kim shym la ïoh ka jingtip kaba thikna bad bun na ki shuki ki thylli lait noh tang katto katne ngut ki nongïalam shnong bad ki trai jaka bad ki paidbah kiba poi ha kane ka jaka ki la kyrpad ruh ba lada don ki public hearing dei ban pyntip bha sha ki paidbah bad ha ka por ba biang.
Bun na ki nongkren ha kane ka sngi ki la pynpaw ba kim don ka jingpyrshah ïa ka jingpynheh ïa ka kad liengsuiñ ha Umroi, hynrei lada katei kaba rim kam treikam bha ki sngew artatien ba kata kaba thymmai kan long kaba kumno, bad kum ki paidbah ki kwah ïa ka roi ka par bad ba katei ka jingpynheh ïa ka kad liengsuiñ kaba thymmai kan ai ka jingmyntoi ïa ki paidbah bad kan treikam bha.
Uwei na ki rangbah na ka thaiñ Umroi u la ther tyngeh ha katei ka sngi halor ka jingai kyrteng Barapani (Shillong Airport) namar ka kyrteng bad ka jaka ka ban sa pynheh kam ïahap satia namar katei ka jaka kaba ki paidbah ki ai ka dei ha Umroi bad ka Barapani kam dei satia ban mih.
Ki paidbah ki la pynpaw ruh kumba ki paidbah ki la ai ïa ki jaka puta ban pynheh ïa katei ka kad liengsuiñ, ki paidbah bad ki nongïalam shnong ki kwah ruh ba katei ka kad liengsuiñ kan ai jingmyntoi ïa ki paidbah naduh ka ïohkam ïohjam, ka jingsiew ïa ka bai jaka kam dei ban slem bad pynsahteng, bad kam dei ban ktah ruh ïa ka mei mariang.
U Aiport Director ka Airport Authority of India (AAI) Rajeev Ranjan u la pynshai kumba long mynta ka kad liengsuiñ ka lah ban pdiang tang ki liengsuiñ kiba rit hynrei ynda la dep ban pynheh ïa kane ka project ba thymmai, ki liengsuiñ heh ki la lah ban ieng ha katei ka jaka kumba 5 tylli ki ban her ruh sha kylleng ki bynta jong ka ri India bad kane kan kyntiew ïa ka ïoh ka kot ka jylla, ka ban khring ruh ïa ki nongwan jngohkai pyrthei ki ban wan beit sha Umroi bad kim donkam shuh ban hiar ha Guwahati.
U la ong ruh ba kane ka jingpynheh ka long naduh ka jaka mareh ki liengsuiñ ne runway, kumjuh ruh ïa ka terminal building bad apron.