Shillong, Lber 31 : Ka Tnad Kam Jngohkai (Tourism) jongka Sorkar Jylla ka la pynpaw ba ki khubor ba mih ha ki social media ba kam ba ka jingtyrwa ban shna ïa ka Taj Umiam Resort & Spa kan buh jingma ïa ka Dam Umiam bad ka dewlynnong Lumpondeng ka dei ka bym don nongrim bad ba ialam bakla.
“Ki jingsngewkhia ba pynpaw ba kane ka project kan pynjot ïa ka mariang lane kan ktah jur ïa ka saw dong sawkun ka Dam Umiam bad khamtam eh ka dewlynnong Lumpondeng ki dei kiba pynsngewthuh bakla bad ialam bakla” ong ka kyrwoh na u Commissioner & Secretary ka tnad Tourism ha ka sngi Ba-ar.
La ong ba ka project kan ïeng ha ka jaka ba 66 acre 36.10 acre ha Lumpondeng bad 29.64 acres ha ka Orchid Lake Resort ba don mynta kan bud ïa ka plan kaba la bishar bniah bha kaba thmu kyrpang ban kyntiew ïa ka kam jngohkai kaba heh dor, kaba duna jingktah haba pynthikna ïa ka jingïada ba pura ïa ka mariang.
Ka Umiam Hotels Pvt Ltd, ka SPV ba la mynjur, kala dep ïoh ïa ka Consent to Establish bad ka la ïasoi ïa ka MoU bad ka IHCL ba kan pynïaid ïa ka nongkynti kum ka Taj Umiam Resort & Spa.
Ka Tnad ka la kdew ïa ki nongrim treikam ka IHCL, kynthup ka jingïashim bynta ha ka Earth Check Certified Program naduh u snem 2008 bad ka Taj Madikeri Resort & Spa, kaba la tei ha ka jaka khlaw ba 180 acre bad ka jingpyndonkam tang khyndiat eh ka jaka.
“Baroh ki jingtei bad ki jingpynïaid kam kin long thik kat kum ki kyndon ka IHCL Taj Brand, kiba bthah ban bud ryntih ïa ki kyndon kat kum ki jingpynwan dur, ka jingshngaiñ, ka jingbha bad ka jingneh”.
Ka bynta ba ka project kan ïaid ruh kat kum ka Forest (Conservation) Amendment Act, 2023, Waterbodies Guidelines, 2023, bad ki kyndon ka Meghalaya State Pollution Control Board, haba buh hakhmat ïa ki lad jingïada ïa ka sawdong sawkun, ka jingtehlakam ïa ka jingpynjakkhlia, pynduna ïa ka jingpynmh jaboh bad ka jingpeitthuh ïa ka jinglong jingman ka mariang.
