Ym don jingkhang ïa kano kano ka Party ban pynïar ïa u pud treikam ha ka jylla : Dr. Ampareen

Shillong, Risaw 14 : Ka Nongïalam jongka NPP kaba dei ruh ka Myntri jongka sorkar jylla ka Dr Ampareen Lyngdoh ka la ong mynta ka Lah Sngi U Blei ba ym don ba lah ban khang ïa kano kano ka party ba kan pynïar ïa u pud treikam jongka ha baroh kawei ka jylla tangba ka long kaba eh pat ïa kano kano ka party kaba pyrshang shwa ban pynjngai bad pynkyrpang ban wanrah ïa ki issue ne ki mat kiba dei la ka jong ym jong baroh ki paid nongshong shnong ba kin suhthied ha kylleng ka jylla.
ïa kane ka Dr Ampareen ka la ong halor ka jingkylli kumno ka sngew halor ka jingpyrshang jongka Voice of the People Party (VPP) ban pynïar ïa u pud treikam ne ban phrung khlieh noh sa sha ri lum Garo.
Haba ïakren bad ki lad pathai khubor ka la ong “ Ka jingkynthoh na nga ka long kaba suk bha. Kano kano ka seng sain pyrthei kaba seng ha ka jylla ki lah ban leh ïa kano kano kaba ki kwah ban leh. Lada ka X Party ka kwah ban pynïar ïa u pud treikam jongka ym don ba lah ban khang namar ka long beaiñ ban khang ïano ïano ban pynïar ïa u pud treikam jongka”
“ Hynrei lada phi kylli ïa nga kaei ka jingthmu ban pynïar ïa u pud treikam, nga tharai ki briew ka VPP kin dei kiba biang eh ban jubab namar katba nga kynmaw hi, ba ka don kawei na ki daw ba ki la leh ha ka por jongka election MP kaba ym sngewtynnad da shisha ban paw ha kane ka jylla Meghalaya khamtam haba kata ka party ka pyrshang ban pynkyrpang beit ïalade tang ha kawei ka bynta jongka jylla. Ngim dei satia ban leh kumne. Ngi la ïohi ba katno ka UDP na ka por sha ka por ka pyrshang beit ban pynïar ïa u pud treikam jongka ha baroh kawei ka jylla. Ngim dei ban shu pynkyrpang ne pynjngai na kiwei bad pyrkhat tang ïa ka jingmyntoi malade nangta phin sa kren sa ïa kata ka jingphiah ïa ka sain hima sima namar ka jingphiah ïa ka sain hima sima kam long kaba bha ban ïakren ne ïatai”, ong ka Dr Ampareen da kaba ban biang “ Nga ïa lade nga kwah ban ïohi ba ka Meghalaya ka dei kata ka Meghalaya ngim dei ban don ka jingïashah liang,ka jingsngew ïahper kaba wanrah ka jingïapait ïapra ha ka jylla”.
Namar ka la ong ba ka jylla Meghalaya kan ym kiew da kaba wanrah da ki jingïa phiah jaidbynriew halor ki katto katne ki mat. “ Nga sngew kmen bad ha ka jingshisha ki paidbah ka jylla kin jied bad bad phin hap ban bret ïa kata ka mat kaba itynnad bha ban ïapeit bad ïohi nangne shakhmat. To ngin ïa peit keiñ shano kata ka mat ne ka menu kan lam” ong biang ka Myntri.
Ka la ong ba ïa ka NPP ki briew ki la bishar bniah bha man la ka por na kata ka daw nga ong “ Lada ngi leh bha ne trei bha ngin sa ïoh ïa u soh ba bha ha ka por election hynrei lada ngi trei sniew ruh ngin sa shah sympat ha ki paidbah ha ka por election hi. Kata ka dei ka riti synshar paidbah bad ngi long kiba pdiang ban shah bishar namar ngin ym pynjngai ne pynkyrpang ïalade. Ngin trei shitom bad ngin pynshisha hakhmat ki paid nongshong shnong jongka jylla ba ka NPP ka dei ka party kaba shakri hok ïa ka jylla. Ngin ym wanrah ka jingïapait ïa pra, ka jingsngew ïapher jaidbynriew ne ki mat kiba ktah ïa ki jaidbynriew kiba don hapoh ka jylla bad ngin ym wanrah ïa ka saiñ pyrthei ne ka synshar khadar kaba ïapait ïapra namar kine ki dei kiei kiei kiba sniew tam ïa ka jylla Meghalaya. Ngi pdiang sngewbha ïa kino kino ki jingshah kynthoh shah kynnoh hynrei mano ba leh kumjuh haba kut pat, ngi mih khmat ïa ka jylla baroh kawei ym tang ïa kawei ka jaidbynriew ne tang shibynta jongka jylla ne ïa kawei ka niam ngi dei ki nong Meghalaya ngin ïatrei lang na ka bynta kano kano ka mat ban poi sha kawei ka thong namar kata ka thong ka long ka lawei jongka jylla” ong ka Dr Ampareen.