Shillong, Jylliew 23: I Prof. Streamlet Dkhar, Nonghikai NEHU, i la ong ba kam don kano kano ka jingïapher hapdeng ki nonghikai skul bah bad ki nonghikai ha ki skul Primary, hynrei ka jingïapher ka long ha ka jingsiew te ka tulop.
Haba kren ha ka jingrakhe dap 40 snem ka seng All Primary School Teachers Association (APSTA) kaba la long ha Dorbar Hall jong ka Dorbar Shnong Jaïaw Shyiap Lum Pyllon, ha ka 22 tarik mynta u bnai, i Prof Dkhar, i la ai burom ïa ki nonghikai Primary da kaba ong ba ym don manomano ruh kiba lah ban poi sha ki kyrdan kiba khraw katno katno ruh khlem da shah hikai ha ki skul Primary.”Nga ruh nga poi haduh kane ka kyrdan, ngam lah khlem da ai burom ïa ki nonghikai kiba la hikai ïa nga ïa u ABKD…”, i la ong.
Shuh shuh, i la ong ba i sngew synei na ka bynta ki nonghikai Primary kiba wat lada idei i tulopiba rit, pynban ki hap ban pynlong ki jingïakhih ban ïoh ïa ka hok jong ki. “Balei ka sorkar ka pyndik bad lehbeiñ haduh katne katne ïa ki nonghikai”, i la ong.
I la ong ruh ba wat ki nonghikai ha ki skul bah kiba la ïoh tulop da ki lak, ki dang don bun ki jingduna bad dang kwah ban ïoh shuh kiei kiei, sa katno tam ki nonghikai Primary ha ka jingsiew kaba rit. I la ai burom ruh ïa ki nongseng ïa ka APSTA, kaba la long ka shatri kaba ai jingïada bad ai jingkyrmen ïa kiba bun ki nonghikai Primary.
Namar ba kane ka sngi kadei ruh ka sngi jong u Thomas Jones, i Prof Streamlet, i la pynkynmaw ruh ïa ka jingnoh synñiang u Rev. Thomas Jones sha ka jinghikai skul Primary da kaba u la pynkhie im biang ïa ki Skul LP ha Mawmluh, Mawsmai bad Sohra. Nangta ka jingshna jong u ïa ki dak thoh Khasi kaba la long ka jingpynkylla dur ïa ka thoh ka tar Khasi.
U Bah J Marweiñ, SDSEO jong ka Shillong, u la long u Kongsan Symbud ha kane ka jingrakhe, ha kaba u la ïathuh ba ka sorkar mynta ka la pynkylla ïa ka rukom siew tulop ïa ki nonghikai kaban ïarapban weng ïa ki jingeh kiba don mynta.
U Bah FC Shullai, General Secretary ka Seng, u la ai ïa ka kaiphod treikam jong ka Seng ha une u snem baladep.
La pynshit rhem ïa kane ka jingrakhe da ki jingrwai bad jingshad na ki nonghikai kiba wan na ki Unit bapher bapher jong ka APSTA.
