Shillong, Iaiong 2 : U Nongïalam ka BJP bad Myntri Sorkar Bah A.L.Hek ha ka sngi Balang ula ong ba kam don satia kano kano ka jingleh bakla ha kaban dawa ban pynkha ïa ki Jylla kiba rit.
“Ki paid Garo ki kwah ïa ka Garoland bad ki Khasi ki kwah ia ka Khasiland, kumta hangno don ka jingbakla ban pan ïa ki Jylla kiba rit. Hato ka don ka jingleh bakla ban pan ïa ki Jylla barit? Kam don jingeh haei haei ruh” ong u Bah Hek.
Une u Nongïalam ka BJP ula kren ïa kane haba jubab halor ka jingkren u (L) Purno Agitok Sangma ba ïadei bad ki Jylla rit.
Hynrei une u Nongialam ka BJP ula kyntait ban kynthoh eiei halor ka jingïather hapdeng u Myntri Rangbah barim ka Manipur N Biren Singh bad u Myntri Rangbah ka Meghalaya Conrad K Sangma halor ka jingkren pyrshah jongu Biren ïa ki jingkren jong u (L) P.A Sangma khamtam kum u Myntri Rangbah ka Manipur u la pheil ban tem ka jinglong jingman ha Manipur.
U Biren Singh haba kynnoh ïa u Myntri Rangbah ka Meghalaya Conrad K Sangma ba u wan tuklar ïa ki kam pohïing ka Manipur, ula thoh ha social media ba ong “U (L) P.A Sangma shisien ka por uba ai ksai ban phiah ïa ka NE sha ki Jylla ba rit ba rit halor ka jingdon ki Jaidbynriew, ka jingthmu kaba buh jingma ïa ka jinglong kawei jong ka Ri. Mynta ngi la ïohi ïa kajuh ka jingpyrshang ban tuklar ïa ki kam pohïing ka Manipur ban pynïapait ïapra ïa ka Jylla”.
“Ngam don eiei ban ong halor ka jingkynad hapdeng u A bad B. Nga don hangne tang na ka bynta ka bha ka miat u paidbah bad ka Jylla Meghalaya” ong u Bah Hek.
Haba kylli, u Bah Hek ula ong ba ka jingïakynad kam dei satia hapdeng ka BJP bad ka NPP.
“Kane kam dei hapdeng ka NPP bad BJP hynrei ngam don eiei ban ong halor kane ka jingïakynad hapdeng kine ki arngut ki rangbah” ula pynkut.
