Ym don jaka ïa ka politik haba ïadei bad ka pisa ki paidbah – Ong u Dr. Mukul Sangma

Shillong, Rymphang 26: U Nongïalam ka Liang pyrshah u Mukul Sangma u la pynpaw ka jingsngewkhia halor ka Chief Minister’s Special Grant in Aid, bad buh ruh ka jingkylli ha kaba ïadei bad ka jingpyntreikam jong ka ha kaba shit ba shai.
“Ngi donkam ban ïoh ka jingtip ha kaba ïadei bad ka jingpyntreikam ïa kane ka skhim bad kumjuh ruh na ka liang jong ka ïing ka donkam ban tip,” ong u Sangma hapoh ka Ïingdorbar ha ka sngi Palei.
“Manla ki jingtuklar kiba khleh lang bad ka pisa jong ki paidbah ba la wanrah bad tyrwa hapoh ka ïing dei ban don ka jingpyni kaba bniah ha kum kino jaka ba dei ban pyndonkam,” u la bynrap.
U la pynpaw ruh ka jingsngewkhia halor ka pisa kaba la pyndonkam na ka thaiñ Songsak ha kaba ki nongtrei jong ka party ki la pynngeit ïa ki briew ban ïoh ïa ki skhim.
“Ïa ka pisa paidbah ym lah ban pyndonkam na ka bynta ka political party,” ban jur u Sangma, da kaba kyntu ïa u Myntri Rangbah ban ai ka jingshai halor ka jingpyndonkam ïa kane ka pisa.
Na ka liang jong u Sangma u la kyrpad ruh ïa ka sorkar ba kan wanrah ïa ki kyrteng jong ki scheme hapoh ka ïing bad lada lah ban leh ïa kane kan pyni ïa ka jingtreikam kaba shai jong ka sorkar.
“Manla ki jingpynlut ïa ka pisa jong ki paidbah dei ban pynwandur bad kadei ban long ruh ka jingmyntoi ïa ki paidbah bad ki kam pynroi jong ka jylla,” u la bynrap.