Ym dei satia ha dewlynnong Lumpongdeng, hynrei ha ka jingtei ba don mynta ka Orchid Umiam

Shillong, Ïaiong 10: U Myntri Rangbah ka Jylla Conrad K Sangma ha ka sngi Thohdieng, ula niew kongsan ïa ka buit pynroi kam jngohkai pyrthei jong ka Sorkar haba pynbna ba ka jingtyrwa ban tei ïa ka Taj Resort & Spa ha Umiam kan ym dei satia ha Lumpongdeng hynrei ha ka jingtei ba don mynta jong ka Orchid Umiam.
U Conrad mynta ka sngi ula pynshai ïa kane halor ka jingmih ki jingsngewkhia, jong ki katto katne ki kynhun halor ka jingtei ïa ki kam pynroi hapoh ka pung Umiam.
“Ka buit pynroi kam jngohkai ka dei ka buit treikam ba kynthup ïa baroh.Kane ka donkam ïa ki jingtei ba hap ban tei, ki hotel ba hap ban tei, ki jingtei five-star bad ha kajuh ka por ban pynthikna ba ki briew jong ngi kin ioh jingmyntoi na ka jingpynroi ïa ki kam jngohkai, donkam ruh ban pynroi ïaki homestay” ong u Conrad.
Haba pynshai ïa ki jingsngewkhia halor ka dewlynnong Lumpongdeng, u Conrad ula ong “Kan ym don satia kano kano ka jingtei ka ban neh pura ha dewlynnong Lumpongdeng” kat kum ka MoU, bad ïaka dewlynnong yn pyndonkam tang ïa kiwei pat ki kam da ki jingtei ba shipor.
Haba kren halor ka jingpynleit jingmut jong ka Sorkar halor ka jingiohnong ki trai shnong, u Conrad ula ong “Ngi donkam ïa ki five-star hotel hynrei ha kajuh ka por, ngi donkam ruh ïa ki restaurant kiba rit bad ngi donkam ruh ïa ki homestay khnang ba ki trai shnong kin ïoh jingmyntoi”.
“Katba ïa kine ki jingsngewkhia lah shimkhia bha, ai ba ngan kular ïa ki nongshong shnong ka Jylla ba ngi kular ban pyn biang tarajur hapdeng ka jingroi ka ioh ka kot bad ka mariang bad ha kajuh ka por ban pynthikna ba ki Resort rem dor kin mih, ki homestay kin mih bad ki jingdonkam kaba ki trai shnong jong ngi kin ioh jingmyntoi na ki” ong u Conrad.