Shillong, Nailar 13: Kum shi bynta ban ïalehkmen ïa ka sngi kha kaba 58, na ka liang u MLA ka Shillong South, u Bah Sanbor Shullai u la jied ban leit ot cake bad ruh ban leit ïaleh kmen bad ki khynnah rit kiba sah ha ka Rilang Children’s Home kaba don ha Nongthymmai Nongshilliang.
Lah ban kdew hangne ba ka Rilang Children’s Home kadei ka jaka sah jong ki khynnah rit ki bym don shuh ki nongri nongsumar lane lada don ruh dei ki bym don shuh u kpa lane kim don shuh ka kmie ban peit bad sumar ïa ki.
Na ka liang u Fr. James Thyrniang Director jong ka Children’s Home u la ïathuh ba ki khlem poi pyrkhat ba u Bah Sanbor un jied ïa ka jaka jong ki ban wan leh kmen Sngikha. U ong ruh ba ki sngewkmen haduh katta katta ba ki khynnah kin ïoh ruh ïa ka lad ban lehkmen sngikha.
Ki khynnah jong katei ka Homes ki la rwai la tem ruh bun tylli ki jingrwai ban pynphuh shuh shuh ïa ka jingrakhe.
U Bah Sanbor ha ka jingkren ba lyngkot u la ong ba um ju kwah satia ban pynlut phut ïa ka pisa ha ki kam sngewbha ki bym dei. U ong ruh ba dei na kane ka daw ha ka jaka ba un leit lehkmen ha ki jaka leh sngewbha u la jied ïa katei ka jaka sah ban ïa ot cake bad ruh ban sam ïa ki jingai sngewbha sha baroh.
“Kiwei nga ju ïohi ba ki pynlut da ki lad bad ki phew lak ban lehkmen ryngkat ki kynhun tem, ka bam ka dih hynrei ngam ju rakhe ne ïa leh lutphut,” u la ong bad ïathuh ba dei da ka jingsyllok bad u Parish Priest na Laban Parish ryngkat u Bah Wallambok ba ki la ïoh ban jied ïa katei ka Homes ban pynlong ïa ka jinglehkmen kaba kham pher.
Hadien ba la ïoh pdiang ïa ka shithi na u Fr. James halor ka jingdonkam ban pynbha thymmai noh ïa ka madan ïalehkai basketball, u Bah Sanbor hangtei hi u la pyntip ba un ai ïa katei ka 7.09 lak tyngka na ka MLA Charitable Fund kaba u ju pynlang 1.03 lak tyngka man u bnai na ka tulop jong u.
Ha kane ka sngi la donlang ruh kiwei ki riewniam kynthup naduh u Fr. Shemphang Dkhar, Fr. Cyril bad kiwei kiwei ki nongshah khot sngewbha naduh u Addl.SP Bah MJ Marngar, Bah Wallambok Khongwir, Mike Laso bad kiwei kiwei.
