Ym dei ban pynduh ki lad jingmyntoi ïa ki bym pat don Aadhaar card, hukum ka MHC ïa sorkar

Shillong, Naitung 21: Ka Ïingbishar ka Meghalaya High Court ha ka sngi nyngkong ka la pynmih ïa ka hukum ba shipor kaba la bthah ïa ka Sorkar Jylla ba kam dei ban pynduh ïa ki lad jingmyntoi ba dei hok ban ïoh da ki briew ki bym pat don ïa u Aadhaar number ne ka card Aadhaar.
Ha kane ka sngi ka Ïingbishar ka la hukum ba ka Sorkar ka dei ban pdiang ïa kiwei pat ki kot pynithuh ne identification document haba kynthoh ba ka jingbym don ïa u Aadhaar number lane card kan ym dei ka jingpynduh ban ïoh ïa ki jingmyntoi jong ki.
Kane ka hukum ka la mih haba shim bishar ïa ka public interest litigation (PIL) ba la mudui da uwei u nongtrei mon sngewbha Greneth M Sangma, uba tynjuh pyrshah ïa ka jingpyntip ba 31 tarik Risaw, 2023 jong ka Sorkar Jylla, kaba bthah ba ki khynnah kiba kwah ban ïoh ïa ki jingmyntoi ban ïoh biang ïa ka pisa ba leh ïa ka fee compensation ïa ka Post Matric Scholarship jong ki ST/SC (free studentship) ka skhim lane ka jingïarap pisa sha ki samla pule ST/SC ka jylla ki bym ïoh ïa kano kano ka scholarship ba ki hap ban don ïa u Aadhaar Identification Number.
Ka Ïingbishar ka pynpaw ruh ba ïa kane ka jingpynbna la pynshong nongrim halor ki artylli ki hukum jong ka Ïingkashari Supreme Court ha ka mukotduma KS Puttaswamy (Retired) bad pyrshah ïa ka Union of India bad kiwei (ors) ha u snem 2015 bad kawei pat ha u snem 2019.
Ka Ïingbishar ka jylla ka la sngew ba ka Aadhaar Act kam shym la pynduh ïa ka hok jong kino kino ki briew ba kin ïoh jingmyntoi lada kim don ïa u Aadhaar nombar.
Ka la ong ruh ba ka kyndon 7 jong ka Aadhaar Act, ka ai ruh ïa kiwei pat ki lad ban pynithuh ïa ki briew ki bym pat don ïa u Aadhaar nombar.
“Halor kane, namar kata, haba ïadei bad ka jingpynbna ba 31 tarik Risaw, 2023, kum ka hukum ba shipor, ngi bthah ïa ka Sorkar Jylla ba ka don ïa ka hok ba pura ban pan ïa ka Aadhaar number ne Aadhaar card na ki briew ban kloi ka jingpynithuh. Hynrei lada kino kino ki briew kim lah ban ai ne kim don ïa u Aadhaar card ne number lane ki bym kwah ban leh Aadhaar, une u briew un hap ban pynshisha ïa ka jingithuh ïa u kum u nongshong shnong haba phai sha kane ka Act lyngba kiwei pat ki kot ki sla ba la ithuh kum ka pan card, voter card, passport bad kiwei kiwei kiba pynhun ïa ki bor ka Sorkar Jylla” ong ka Division Bench u Chief Justice IP Mukerji bad Justice W Diengdoh ha ka hukum ha ka sngi nyngkong.
Ka la ong, “Namar kata, ka jingbym lah ban ai ïa u Aadhaar number lane ka card kan ym dei satia ka jingpynduh ia ki lad jingmyntoi.”
Ka la ong ba ïa kane ka PIL yn sa buh thup ban shong bishar biang ha ka 12 tarik Nailar 2025, hadien ba ka Ïingbishar ka la shong pyrkhat bha ïa kane ka kam, kynthup ïa ka Aadhaar Act, Rules, ki hukum jong ka Ïingbishar Supreme Court bad kiwei kiwei kiba donkam.