Ym dei ban pyndonkam bakla ïa ka ram, kyntu u MDC Nongstoiñ

Nongstoiñ, Jymmang 2: Kum shibynta ban rakhe ïa ka jingdap 75 snem ka ri India, ka Office jong u BDO Nongstoiñ ha ryngkat ka NRLM Nongstoiñ ki la pynlong ïa ka SHG Mela Cum Financial Literacy Camps ha madan New Nongstoiñ. Ha kane ka Mela, la ïa shim bynta da ki 500 tylli ki SHG bad kumba 50 tylli ki Village Organization kaba kynthup ruh ïa ki bank kiba hap hapoh ka District.
Haba kren kum u kongsan u bah G.Wahlang MDC ka Nongstoiñ, u la ïaroh shibun ïa ki nongpynïaid kiba la pynlong ïa kane ka program ka ban ai jingmyntoi shikatdei eh ïa ki dkhot ka SHG. Kumjuh ruh ban ïoh jingpynshai halor ki kot jingdonkam kiba hap ban pynbiang ban ïoh ïa kitei ki Scheme ne ram ba ka sorkar ka ai lyngba ki bank. U la pynshlur ïa ki dkhot ban shim ka kabu ïa kine ki lad ai jingïarap jong ka sorkar bad ki scheme.
U da ban jur ruh ba ym bit ban pyndonkam bakla ïa kane ka ram, hynrei ban pyntreikam ïa ka kum ba lad ban kyntiew ïa ka kamai ka kajih bad ka ïoh ka kot ym tang ïa ki dkhot, hynrei ïa ka imlang ka sahlang ruh kumjuh. U la kren ïaroh shikatdei eh ïa ki longkmie bad kynthei ka jaidbynriew, ba ki long ki ba stad bad kiba don ka jingkitkhlieh ban pynïaid ïa ka pisa tyngka ym tang ha ïing, hynrei ha ka imlang sahlang ruh kumjuh.
Kiwei pat kiba la ai jingkren ha kane ka Mela, ki long u Syiem jong ka Nongstoiñ, u ADC Bah M.Diengdoh, u BDO Bah T.Diengngan u ba la ai ka jingkren pdiang ha kane ka jingïalang, u Bah R.Kharsyntiew DMM-NRLM West Khasi Hills. Ïa kane ka Mela la pynïaid da I bah M.L.Mawnai, bad ïa ka jingkren ai khublei la ïoh na I kong S.Sangriang BPM-NRLM. Kumjuh ruh ka la don ruh ka jingsam ïa ki khusnam sha ki nongtrei jong ki Bank kum shi bynta ban ai jingïaroh ïa ka jingtrei shitom jong ki.