Ka jingsalia bad ka jingbym sngewtynnad shuh jong kane ka pateng ba mynta ban bud ïa ki kmie ki kpa khamtam ki khun kynthei ban bud ïa ka riam ka beit tynrai kaba mut la ka long naduh ka jain kyrshah, ka tapmoh bad kiwei kiwei ka la nang pynisting thew bha ïa ka jinglong tynrai ka Jaidbynriew Khasi katba nang ïaid ka por khamtam eh ha ki shnong kiba don ha sor bad khap sor. Lehse phin dang lah ban ñiew katno ngut ki khynnah samla ba phin ïohi ha ki surok shnong lane ha ki dong jong phi ba ki dang sem lane kyrshah.
Balei ki nongwan jngohkai pyrthei na kylleng ki bynta jong ka pyrthei ki sngewtynnad ban leit sha nongkyndong namar ha kito ki jaka ki ïoh ïa ka lad ban ïohi ïa kata ka jinglong ba shisha jong ki briew, la ka long ha ka rukom im kaba man ka sngi, ka bam ka dih, ka trei ka ktah bad ruh haba ïadei bad ka akor ka burom. Ki briew ha nongkyndong kim donkam ban da tah da peiñ ïa ka rukom im, ka riam ka beit lane ka rukom bam hynrei ki hun beit ïa kaei kaba ka mariang ka la ai ha ki. Kane kadei ka rukom im kaba paka tam kaba kum ka Jaidbynriew ka dei ban sngew sarong. Kam pher lada ki duna ka ïoh ka kot hynrei kim ju klet pat ban kynmaw ïa ka riam ka beit tynrai, kin ym klet satia ba shwa ban mih na iing ba ki dei ban da kyrshah ryngkat bad ka tapmohkhlieh. Kane ka dei ka bynta jong ka jingim kaba la pynrung ha ki da ki kmie ki kpa tymmen kaba lah ban long ba ka la kylla long kata jingmlien kaba ym lah shuh ban klet.
Ha kiba bun ki shnong ba kham jur ka jingkhriat ha ka Jylla wat ki rangbah ruh haduh mynta mynne ki dang tawah ïa ka tapmohkhlieh, kane ka jingmlien ka dang neh ha ki kampher la ki phong da ki sut hynrei haba la kyrni ka jingmlien khlem tapmohkhlieh ki sngew thylli ban mih na iing. Ïa kane kein ki ong ba ka jingsneng na la rympei ka kham kor arshah ban ïa ka riam rongphong kaba shu bud tynneng na ki ri sepngi. Shi bynta lah ban ong ba ka dei ka jingmlien jong ki nongshong shnong ban riam kumta, hynrei kane ka pyni pat sha ka pyrthei ïa kata ka jinglong kyrpang haba la ju ïohi ba ki nongwei kiba wan na ki ri ba jngai ki ju pyrthuh lang ban tap ïa ka tapmohkhlieh haba ki wankai shane.
Lehse da kaba ki pyrthuh kumne, ka rah pat ka khubor sha ka ri ba ki wan ba ki dang don ki jaidbynriew kiba riam kham phylla na kaei kaba kiwei ki ri ka pyrthei ki riam. Kan pyni ruh sha ka pyrthei ba ki nong Meghalaya kim riam kumba leh kiwei ki jylla jong ka ri India lane kumba shu phong jain ha kiwei pat ki bynta jong ka pyrthei. Kane ka la nang pynphylla shuh shuh.
Ka bynta kaba kham kyrpang ka long ba lada don mano mano ki riew pawkhmat haba ki wan sha ka jylla bunsien la ju ïohi ba lada wan ka kynthei ne ki shynrang ruh kin pynriam da ki riam tynrai jong ki Khasi, Jaintia ne Garo hynrei kham bunsien pat ki jongngi pat kim da pyrwa than ban riam ïalade kumtei haba don kum kitei ki prokram. Lada shu ai nuksa, lada jia ba ha kawei ka jingïalang kaba poi haduh 500 ngut ki briew bad ki briew ba kyrpang ruh dei ki kynthei lehse kan pynphuh shuh shuh lada jia ba ki trai jylla kin riam da ki riam tynrai lajong, kam pher la ka dei ha ka riam Khasi, Jaintia ne Garo hynrei kane kan pynlong bad pynkyndeh lang ïa kito kiba wan lada ki ïoh lang ïa ka kabu ban riam lang kumba riam ki trai jylla.
Tangba sngewsih pat ba ha kane ka juk kaba mynta la ïohi ba bun kim da salia than shuh ban ïa pyndonkam da ki riam tynrai namar baroh baroh la ka long ha ki kam khawai, kam ïathoh shongkurim bad kiwei kiwei la ïa beh thong lut da ki riam nongwei.
Kum ka Jaidbynriew ngi dei ban sngewthuh ba ka riam ka beit ka dei shi bynta ban pynneh pynsah ïa ka jinglong tynrai jong ka Jaidbynriew namar khatduh haba leit sha kino kino ki jaka, haba kham pher ka riam ka beit baroh kin kylli pyrthew nangno ki wan, na ka jylla ne ka ri aiu ki wan. Dei na kumta ba kiwei ki ri ruh kin tip ïa ka jinglong kyrpang jong ka Jylla bad ki nongshong shnong jong ka.
