Shillong, Rymphang 21: U MDC ka Mawkhar-Pynthorumkhrah u Bah P N Syiem uba la long teng u CEM barim ka KHADC bad uba dei ruh u kyrtong ka seng Congress hadien ba u la dep ban thep ïa ka vote jong u la pynpaw ba u dang don ka jingkyrmen ba ki paidbah kin dang jied biang ha kane ka kynti ïa u kum u nongmihkhmat na kane ka constituency.
Haba kren sha ki lad pathai khubor hadien ba la dep ban thep kyrteng u Bah Pynshngaiñ u la ong ba ka thong kaba u don lada ki paidbah kin dang pynjop biang ïa kane ka kynti ka long ban shimkhia ïa ka jingpynbeit thymmai ïa ka Sixth Schedule ban bsuh katto katne ki jingmut na ka Artikle 371.
U Bah PN Syiem u la ong ruh ba lada ki paidbah ki dang jied ïa u un shim khia ban pynbeit ïa ka 6th Scheduled bad ban bsuh sa katto katne ki jingai jingmut napoh ka article 371 bad ban pynkham janai ïa ki rukom treikam ka District Council.
Ha kaba ïadei bad ki marpoh khyndew bad mineral resources u la ong ba donkam ban bsuh ïa katto katne tylli ki mat kiba dei bad ka article 371 kaba don hapoh ka 3 (A) bad katto katne kiba don hapoh ka 6th Scheduled bad kumjuh ruh ban peit ba ki aiñ jong ka Parliament bad ka jylla kin ym lah ban treikam hapoh ka paragraph ba 3.
“Ngam sngewdei ban ong ban pynkhlaiñ ïa ka article 371 hynrei ban pynkhlaiñ ïa ka 6th Scheduled na ka bynta ka jingmyntoi jong ki briew jong ngi, bad ban bsuh katto katne ki jingai jingmut na ka article 371 sha ka 6th scheduled khnang ba ki briew jong ngi kin don ha ka jingïada bad kaba shngaiñ,” u la ong.
U la pynpaw ruh ïa ka jingsngew ba kumba ka paw shabar kam don eh ka jingma na ka VPP ne UDP hynrei u la ong pat ba um lah ban tip ïa ki vote ba jar jar bad kumba ka long mynta ym da ïohi than ïa ka lyer jong ka VPP ne ka UDP.
