Shillong, Nailar 17 : U Nongïalam ka Liang Pyrshah u Dr Mukul Sangma u la ong mynta ka sngi Balang ym baroh ki nongshong shnong ki pdiang ïa ka NPP ruh. ïa kane u la ong halor ka jingkynthoh jong u Symbud Myntri Rangbah bah Prestone Tynsong ba ki MLA ka AITC ki dei ban leit pynïasoh noh sha ka BJP shwa ka election MLA 2023. U la ther kylla ïa u bah Prestone da kaba ong ba u la shu kren ha ka rngai.
“ Ngan ong. u ( bah Prestone) u lah ban shad kmen ha ki jingphohsniew jongu mynsngi katba u dang kwah. Phi tip u ei u bah Prestone, nga ruh nga tip bha shaphang jongu, kumta u lah ban shu kren ha ka rngai ne ha ki jingphohsniew bad kren ruh katba mon klem da don kata ka jingkitkhlieh” ong u Dr Mukul.
U Dr Mukul u la kren kumne namar u sngewbitar ïa ka jingkren jong u bah Tynsong da kaba u la phah ïa ki MLA ka AITC hapoh ka jingïalam jong u Dr Mukul ba kin leit pynïasoh noh sha ka BJP shwa ka election 2023.
“ Lada u Dr Mukul bad u bah Charles Pyngrope ki kwah ïa ki jingai jingmut jong nga ngi lah ban ïashong bad ngan ai jingmut ïa ki ba kan jin da la bha ba kin pynïasoh noh sha ka BJP shwa ka election” ong u bah Prestone dang shen.
U Dr Mukul ula kren dom ruh da kaba ong ba u bah Prestone bad ka NPP kim donkam hi ruh ban pdiang ïa ka AITC tangba ki dei ban tip kaei kaba jia ha madan. “ Hato u bah Prestone u tip ba ym baroh ki nongshong shnong ki pdiang ïaka NPP ruh?”
U la ong kaei kaba jia ha madan ka long ba kito kiba ju kwah ban ïadon bad ka NPP mynta ki la sdang ban mad jingeh bad kiba bun ki la nang phet bad ki nongïalam ka NPP kim lah ban bat ïa ki. Lada phim ngeit leit shaki paidbah kylli phin sa sngewthuh, ong u Dr Mukul.
