Ym ailad shuh ka Sorkar Jylla ban ïoh jingmyntoi kiba duna dkhotmet ar tylli ki skhim

Shillong, Lber, 22: Ka Sorkar jylla dang shen ka la phah da ka jingthoh sha ki briew kiba duna dkhotmet lyngba ki ophis jong ki Child Development Project Officer, ICDS Porject ba kin jied noh tang kawei napdeng ki ar tylli ki skhim ba ka Sorkar ka ju ai jingïarap kum ka jingmyntoi.
Kumba ju long baroh shikatta, ki briew kiba duna dkhotmet ki ju ïoh jingmyntoi lyngba ka Chief Minister Social Assistance Scheme (CMSAS) kaba T. 500 shi bnai bad kawei pat ka dei kaba la tip kum ka Unemployment Allowances kaba dei ka skhim na ka ophis jong ka tnat Social Welfare kaba T. 1000 shi bnai.
U President jong ka Khasi Disabilities Association (KDA) u Bah Starwin Kharjana ha ka jingïakren bad ki lad pathai khubor ha ka sngi Baar u la ong, “mynta ka Sorkar ka la bthah ïa ngi kiba duna dkohtmet ban jied tang kawei na kine ki ar tylli ki skhim.”
U la ong katkum ka shithi ba la phah da ka Child Development Project Officer, ICDS Project ïa kaba la pynpaw lang ki kyrteng jong ki nongïoh bynta ba mynta kim lah shuh ban ïoh ar tylli ki skhim hynrei kin hap ban jied tang kawei bad nalor kata la ai por ruh ba kin pyndap ïa ki kyrteng haduh ka 18 tarik mynta u bnai.
Une u nongïalam jong ka KDA ula ai ka jingïaroh ïa u MLA ka Umroi Constituency u Bah George B. Lyngdoh uba la rah hapoh ka Dorbar Mang Tyngka jong ka Iingdorbar Thawaiñ ka jylla ba dang shu kut shen ba ka Sorkar ka dei ban pynlong aiñ noh ïa ka Aiñ Rew ba la tip kum ka “Meghalaya Compulsory Protection of Welfare of Children with Special Needs Bill, 2022,” ba ka Sorkar kan ai jingithuh noh ïa baroh ki khynnah kiba don jingduna ha ki dkhotmet kaba ym duna ïa ka 40 percent bad ba ka Sorkar Jylla ka dei ban pynrungkam ïa ki khynnah kiba wan na ki longing longsem ki baduk.
Haba pynpaw ba ka hok jong ki briew kiba duna dkhotmet kam pat treikam pura ha kane ka jylla Meghalaya, u Bah Kharjana u la ong, ‘ka aiñ Right to Persons with Disabilities Act haduh mynta hi kam pat treikam pura hapoh kane ka jylla Meghalaya. Lada ka treikam pura, ngin ïoh nong shikatdei eh ha ka ïohjam ïohjam, kino kino ki skhim kiba ngi dei hok ban ïoh, hynrei haba ïanujor haduh mynta kam don satia kum kata.”
“Baroh ki hok jong ki briew kiba duna dkhotmet ladep thoh lut ha ka Aiñ bad nga kyrpad ïa ki MLA lada ki don ka jingsngew na ka bynta jon gngi kin kyrpad hapoh ka ingdorbar thawaiñ ba ka Sorkar kan pyntreikam pura ïa kane ka aiñ Right to Persons with Disabilities Act,” la kyrpad une u nongïalam ka KDA ïa ki MLA.
Shuh shuh u la ong ruh ba ka jingkren jong u MLA ka Umroi hapoh ka Ingdorbar Thawaiñ dang shen kan kyrsiew thiah ïa ka Sorkar Jylla ba kan leh eiei.