Ym ailad ki pulit bad majistor ïaki sengbhalang ban rung sha ophis u Deputy Commissioner ha Ri-Bhoi, shah pynsangeh ka Interview thungkham ka tnad PHE
Haka sngi pynbna ïaka Non Co-operation Movement
Nongpoh, Naiwieng 25: Ki 4 tylli ki kynhun sengbhalang naduh ka KSU, FKJGP, RBYF bad HNYF mynta ka sngi kila leit ban rung sha ki ophis sorkar ha Ri-Bhoi ban bthah ïa baroh ki nongtrei sorkar ba kim dei ban leit trei kaba dei ruh ka sngi ba kitei ki kynhun seng kila pynbna kum ka non co-operation movement ne ka jingïakhih ban khot ïaki paidbah bad khamtam ïaki nongtrei sorkar ban nym leit trei kum ka dak ban ai jingkyrshan ïaka jingïakhih naka bynta ki lanot ha Mukroh.
Hynrei kitei ki kynhun seng kila shah pakhang lynti noh ha shuwa ba kin leit ban rung ha ophis u Deputy Commissioner ka Ri-Bhoi ha Nongpoh ha kaba kala mih ka jingïañia kaba jur bad ki majistor bad bor pulit jong ka Ri-Bhoi, kiba la khanglad ba kim shah tdot ban rung shapoh ha kaba naka liang ki bor district kila pynphai ñia ba ki ruh ki trei bad shakri naka bynta ki paidbah, khamtam bun ki nongkyndong kiba wan pyndep ïaki kam ki jam bad kumba kam dei ruh ka sngi shuti bad kim lah ban shu pep trei kulmar.
Naka liang kitei ki kynhun seng kila pyrta ruh nabar ka khyrdop ïa baroh ki nongtrei ba ki dei ban mih noh mardor, ba kin dei ban don ka jingkitkhlieh naka bynta kitei ki lanot ha Mukroh bad ka jingjia kaba ishyrkhei ba haduh 5 ngut ki mynsiem briew kila duh ei ïala ka jingim.
Ha katei ka juh ka sngi naka liang ka ophis u Superintending Engineer ka tnad PHE Nongpoh kila hap ban pynsangeh noh shisyndon ïaka Interview thung kham halor ki post bapher bapher ba katei ka ophis kala dep ban pynbna hadien ba kitei ki kynhun seng kila leit ban pynsangeh mardor haka jaka ba pynlong ïaka Interview.
Haba kren sha ki lad pathai khubor ha katei ka sngi naka liang kitei ki nongïalam seng kila pynpaw ba ka daw bala pynlong ïaki ban leit mih sha ki ophis treikam ka dei namar ba bun naki nongtrei sorkar kim shym la patiaw ïaka jingkyrpad jing ki kynhun seng ban sangeh ne pap trei ha katei ka sngi kum ka dak ka jingburom lem ïaki lanot bad ka jingjia ba Mukroh.