Shillong, Naitung 07: Sa shi sien pat ka lahduh jong u snem ba ladep, kata ki thei kynjat bol jong ka Mawlai SC ka la ïoh ban bteng ïa ka lynti ïaid jong ka shaduh ka semi final jong ka lympung Shillong Sports Association’s Women’s League ryngkat bad ka Lumparing SC na ka thup kynhun kiba napoh ka Group-A hadien ba ki la ïoh ban khur ïa ka namjop ha ka jingïalehkai hynne ka sngi ha Madan Third Ground Polo.
Ha ka jingïalehkai kaba nyngkong, ki thei ka Lumparing ki la lah ban jop kput da 6-0 kol ïa ka Synroplang 77, hynrei na ka liang jong ki thei ka Mawlai ki la lah ban ïai bteng ban pynpaw ïa ka jingthrang ban ïohrah biang sa shi sien da kaba pynjemkhnap ïa ka Maw U-Tieng haduh 7-0. Baroh ar tylli ki jingïalehkai ki dei napoh ka Group B bad kine ki ar kynhun na kane ka Group kin sa hap ban aireng pyrshah ïa ka Laitkor SC bad ka PFR Football Academy kiba la ïoh ban rung sha ka semi final na ka thup Group A. Hynrei, ha kaba ïadei bad ka jingïakhun na ka bynta ka semi final, ym pat shym la pynbeit naba baroh ar ki Group ki dang sah sa shi sien ïakhun.
Haba phai sha ka jingïalehkai kaba la long hynne ka Sngi Thohdieng, ka la shimpor kumba shiteng kynta shuwa ba ka Lumparing kan sa ïoh ban pynïakhlad ïa ka jingïakhaid bad ka Synroplang, lyngba ka kol kaba la thep da ka Chibaral Sangma (32′).
Hynrei ka jingïoh ban pynkhihjar ka la sdang ban bud kawei hadien kawei ha ka kylla kaba ar ba la thep da ka Catherine Kharkongor (38′, 69′), ka Ephilis Khongwet (47′) bad ka Inri-la-i-dor Khongthaw (49′, 67′) kaba la ïarap ïa ka Lumparing ban khur ïa ka namjop kaba suk.
Ha ka jingïalehkai kaba ba bud, ki thei ka Mawlai ki la pyni ïa ka jingkhlaiñbor da kaba pynkhihjar haduh san kol tang ha ka kylla step, kiba la wan na ka Makrisha Songthiang (3′), bad ka Sunalinda Iawren ka la ïoh ban khyrwit haduh saw kol (8′, 24′, 29′, 53′) kaba la khur ruh ïa ka namtam ha kane ka jingïalehkai.
Kawei na ki kol ba la thep da ka Iawren ka dei kaba la ïarap da ka Marbarin Nongrum, kaba la lah ban lehkai bha ha ki bynta liang kamon jong ka madan ban shna ïa ar tylli ki kabu ban pynkhihjar.
ïa ki ar kol patde na ka bynta ka Mawlai la wan lyngba ka kjat jong ka Dai-aijingsuk Basaiawmoit ha ka minit ba (25′) bad ka Ideibanri Kharpan (46′).
Watla kata ruh, na ka liang jong ka Maw U-Tieng’, ka Nibari Maring thei-apkol jong ka kynhun, ka la lah ban ïada ïa katto katne ki kabu haduh kaba kut jong ka jingïalehkai; hynrei kam shym la lah ban khanglad ïa kane ka lahduh snem ba ladep ban pynkhihjar.
Ha kaba ïadei bad lashai ka sngi, kan nym don kano kano ka jingïalehkai Women’s League tad haduh ka 12 u Naitung, bad ki jingïalehkai kin dei na ki kynhun jong ka Group A.
