Woh nia ka Congress ba phiel ka polisi treikam ka Sorkar Jylla ban khanglad na ki kam bymman

Shillong, Risaw, 11: Ka Congress ha ka sngi Saitjaiñ ka la pynlong ïa ka jingpyrshah da kaba thang ïa ki dongmusa ban pynpaw ïa ka jingbitar halor ka jingshah pynïap ba dang shen jong ki lai ngut ki heprit ha ka jylla tang hapoh khyndiat bnai.
Ïa ka met jong u heprit uba dang 7 snem ka rta bad ka met jong i heprit kynthei ba la 13 snem ka rta la lap ha ka rukom kaba ipangnud bha, kaba la pynkhih bitar halor ka jinglong jingman jong ka shongsuk shongsaiñ ha ka jylla Meghalaya.
Ïa ka met jong u heprit 7 snem la lap narud surok khlaw Mawpat ha ka 9 tarik, Risaw, shi sngi hadien ba u la jah rngai na phyllaw ing ha Lum Myrboh, Nongrah. Ïa i heprit kynthei ba la 13 snem ka rta la kynnoh ba i la shah leh be-ijot shwa ban shah dkhat jubor ka jingim ha uwei u runar uba la 22 snem ka rta ha kawei ka shnong ha Ri Bhoi District. Shwa kane, dang ha u bnai Nailur, 2025, i Insaphira Lyngdoh Mawnai iba la 4 snem ka rta na ka Dong Brei, Nonglum, Nongrah, Shillong i la jahrngai na phyllaw iing bad tang hapoh 24 kynta la lap ïa ka met jong i na kawei ka iing ba dang shan hajan iingsah.
Ka jingïakhih jong ka Congress ka la pynpaw ïa ka jingbitar jong ki paidbah kaba nang jur halor ka jingai jubab ka Sorkar ïa kine ki kam runar kiba shyrkhei.
Ki dkhot ka seng Congress ki la rah ruh ïa ki plakad ba pynrem ka Sorkar bad ïa ki riewbymman ha phyllaw ka Congress Bhavan bad pynlong ruh ka jingsngapjar kum ka jingburom ïa ki mynsiem ba la khladnoh.
Ha ka jingïakren bad ki lad pathai khubor, u Secretary jong ka Meghalaya Pradesh Congress Committee (MPCC) u Bah Manuel Badwar u la wohniah ïa ki polisi treikam ba la phiel jong ka Sorkar Jylla ki bym lah ban khanglad ïa kam runar ruser ha ka jylla.
“(Namarkata) ka donkam ïa ki polisi kiba jlan por ban pynkhlaiñ ïa ki jinglong jong ka iing ka sem bad ban kyntiew ïa ka jingïatylli ha ka imlang sahlang,” u la ong. U Bah Badwar u la pynpaw ruh ïa ka jingsngewsih halor ka jingkynthoh jong u Myntri Rangbah ka Jylla ka tnat Kam Pohing Bah Prestone Tynsong halor ki kam runar ba dang shen, da kaba ong ba “ka pynpaw ba dang duna ka jingsngewthuh ïa ki jingeh ba ki paidbah barit baria ki ïakynduh”.
U la kyntu ïa ka Sorkar ban shim ïa ka rukom treikam kaba thymmai, kaba kynthup ïa ki tnad bapher bapher bad ki kynhun bapher bapher ban thaw ïa ki polisi kiba weng ïa ki daw tynrai jong kine ki jingeh.
U nongïalam ka MPCC u la pynrem ïa ka jingbym lah jong ka Sorkar ban ai ka jingïada bad ai jingkyrshan kaba biang ïa ki longiing khamtam ïa kito kiba im ha ki jingduna ha ka ïoh ka kot.
U la ban jur ba uwei pa uwei u khynnah u don ka hok ban im, ban ïalehkai, bad ban roi ha ka jaka kaba shngaiñ, bad ka dei ka kamram jong ka Sorkar ban pynthikna ïa kane.
U Bah Badwar u la dawa ban don ïa ka polisi kaba bniah ban weng ïa ki jingeh ha ka imlang sahlang bad ka ïoh ka kot kiba ktah ïa ki longiing bad ïa ki khynnah bad ka ban wanrah ïa ka jingkitkhlieh hapdeng ki nongshong shnong.
U la kyntu ïa ka Sorkar ban ïatreilang bad ki kynhun bapher bapher, kynthup ïa ki nongshong shnong, ki skul, bad ki Balang, ban thaw ïa ka rukom treikam kiba lah ban weng ïa kine ki jingeh.
Ha kawei pat ka liang, ka President jong ka Meghalaya Pradesh Mahila Congress (MPMC) Kong Joplyn Scot Shylla, ka la ong ba dei ban don ïa ki lad ki lynti kiba kham pyrkhing ban weng ïa ki daw tynrai kum kine ki kam runar da kaba khang ïa ki jaka pyni dur jakhlia bad ban pyrkhing ïa ki jingthoh online kiba lah ban ïoh da ki khynnah, da kaba kdew ba ka lah ban ktah ïa ka jingmut jingpyrkhat bad ka jinglong jingman jong ki.
Ka Kong Shylla ka la ban jur ruh ïa ka jingdonkam ban pynrung ïa ka jinghikai shaphang ka jingshongkha ha ki skul bad ban kyntiew ïa ka jingïakren kaba laitluid hapdeng ki kmie ki kpa bad ki khynnah ban ïada na kum kine ki jingjia.
Ka la pynpaw ïa ka jingdonkam ban pynbha ïa ka jingshngaiñ jong ki paidbah, da kaba kdew ba ki nongshong shnong khamtam ki khynnah ki long kiba shah ktah ha ki kam runar namar ka jingbym don ki lad jingïada.
Ka nongïalam jong ka Mahila Congress ka la ong ruh ba dei ban buh hakhmat eh ïa ka jingshngaiñ, da kaba kdew ba katba ki don ki riewshimet kiba ïoh ïa ka leit ka wan kaba shngaiñ bad ki bor pahara kiba biang hynrei kiwei pat ki shah pynbor ban ïaid ha ki jaka paidbah khlem ka jingpahara kaba biang.
Ka la kyntu ïa ka Sorkar ban pyndait ïa ki CCTV ha ki jaka paidbah bad ban phah pahara ïa ki Pulit na ka por sha ka por sha surok khnang ban khanglad ïa ki kam runar ruser.