Jowai, Naiwieng 24: Ka Demthring kala khur ïa ka jingjop hadien ba ka pynliem noh da 1-0 kol ïa ka 7-Wasa United ha kawei na ki jingïalehkai ka lympung ‘Super Division Football Tournament – 2025’ kaba la long hynne ka sngi Nyngkong, 24 tarik Naiwieng, 2025, ha madan Kiang Nangbah Stadium, Dongmihsngi Jowai.
ïa ka Super Division Football Tournament kaba la tip kum ka “17 U Kiang Nangbah Memorial Trophy”, la pynïaid bad pynlong da ka West Jaiñtia District Sports Association, (WJDSA) Jowai ha madan Kiang Nangbah Stadium.
Haba phai sha ka jingïakhun jong kane ka sngi ka kylla step ka la long kaba ïaryngkat bor, ha kaba baroh arliang ka Demthring bad ka 7-Wasa United kim shym la ïohlad satia ban pynkhihjar bad jam sha ka por shongthait khlem da ïoh thep kol.
Ha ka kylla miet ka jingïakhun ka la paw kumba kan kut da ka jingïakhaid, hynrei ha ka khyllipmat jong ki minit ba khatduh ka Demthring ka la ïoh ba kan pynkhihjar lyngba u Civility Khongmalai (82’) ban pynthikna ïa ka jingjop.
