WJDSA: Rung Final sa ka M.Thadmuthlong ha ka 1st Div; jop ka Carpedien FC haka 1st Women League

Jowai, Naiwieng 03: Ka Madan Thadmuthlong SC ka la lah ban pynliem noh da 3-1 kol ïaka Lion Sports & Youth Affairs ha ka jingïakhun Semi final kaba ar hynne ka sngi Nyngkong ban ïoh rung sha ka wat ïakhun nam lahduh ha ka lympung phutbol First Division Football Tournament-2025 bala pynïaid daka West Jaiñtia District Sports Association (WJDSA) ha madan Kiang Nangbah Stadium Dongmihsngi, Jowai.
Ka Madan Thadmuthlong SC ka la pynkhihjar lyngba u Precious Tang (1 & 73) bad u Pynïaidmiki Tang (18’). Ïa ka shikol naka Lion Sports & Youth Affairs la thep da u Edius Laloo haka minit ba 51.
Lyngba kane ka jingjop ka Madan Thadmuthlong SC kan pynkhreh ban ïaknieh nam lahduh pyrshah ïa ka Dulong FC, kaba la jop ïa ka jingïakhun Semi Final kaba nyngkong ha ka sngi Saitjaiñ, 01 tarik Naiwieng, ha kaba ka la pynliem noh da 6-0 kol ïa ka Nangbah Iawmusiang SC.
Haba phai sha ka jingïalehkai ka lympung 1st Women League Football Tournament 2025, ka Carpedien FC kala pynliem noh da 3-0 kol ïaka Spahmariang SC.
ïa kitei ki kol naka Carpedien FC la thep daka Daphi Dkhar haka minit ba 9 & 43 bad ka Elizabeth Thianglai haka minit ba 35.