Wer u Myntri Rangbah ïa baroh ban ïashim bynta ha kaba kyntiew ïa ka kam rep khlem sboh dawai
Shillong, Nohprah 01 : U Myntri Rangbah ka Jylla Conrad K Sangma ula ban jur ba ka jingpynïaid shakhmat ïa ka Organic Mission ne ka thong ban pynmih marrep ba khlem khleh dawai, ka donkam ïa ka jingïatreilang na baroh ki kynhun kiba ïadon bynta ha ka kam rep.
“Ka thong jong ngi hi ka long ban kyntiew ïa ki nongrep ka Jylla jong ngi bad ka thaiñ. Nga kyntu ïa baroh ki kynhun ba don bynta ym ban shim ïa kane tang kum ka jingkut ka jingïalang, hynrei kum ka jingsdang ïa ka lynti ïaid kaba jngai. Ha ngi, ki nongrep kin ïai don hapdeng eh ha ka jingthaw ïa ki policy bad man ki prokram la buh da ka thong bad ka por ban pyndep” ula ong.
U Conrad ula pynpaw ïa kane haba ai jingkren ha ka sngi kut jong ka 1st Northeast India Organic Week bad ka 4th IFOAM World Organic Youth Summit ba long ha Shillong hynne ka sngi Nyngkong. Kane ka prokram ka dei ka jingpynkut ïa ka jingïalang ba saw sngi jong ki nongkhaïi, ki stad rep khlem dawai, ki kynhun ki samla, ki kynhun ki nongrep bad ki kynhun bapher bapher kiba dei na ka thaiñ bad kiba nabar ri ruh kumjuh.
U Myntri Rangbah ula ban jur ïa ka jingïaid ka kam rep khlem dawai bad ka kolshor hangne ha Meghalaya bad ong “Ka kyntien rep khlem dawai, ka kham palat ïa kaei kaba shu ïakren. Ka don jingïadei bad ki nongrep jong ngi, ki longshuwa jong ngi, bad ka rukom rep jong ki briew jong ngi kaba la ïaid da ki spah snem. Katba ka pyrthei ka dang jam sha ki teknologi ba tymmai, ki rukom rep tynrai jong ngi ki dang ïai neh kumjuh-kaba mynta ka ïeng kum ka jingkyrkhu ba wan na shalyndet. Ka thaiñ Shatei Lam Mihngi baroh kawei ka don ïa ka jingnang jingtip kaba bun kyrhai ba kumno ngin lah ban ïasam mynta bad ka pyrthei”.
U Myntri Rangbah ula pynbna ruh ïa ka jingkut jingmut jong ka Jylla ban nang pynïar ïaka rukom rep ba khlem khleh dawai. “Ngin dang pynmih ïa ka thong hynrei kaba lah ban kynjoh ha kaban pynïar ïa ka kam rep khlem khleh dawai ha kylleng ki jaka rep hapoh ka Jylla. Kane kan dei ka jingsdang kaba rit hynrei kan kyrshan shibun ïa ki nongrep bad kan ktah bha ïa ka imlang sahlang”.
Kiwei pat kiba la ai jingkren ki kynthup ïa ka Vinita Sudhanshu, General Manager, APEDA, ka Jennifer Chang, Executive Director, IFOAM Asia, ka kong Isawanda Laloo, Secretary, Agriculture and Farmers’ Welfare, bad kiwei kiwei.