Wer u Myntri ka tnat Pule Puthi ban ïatreilang ha kaba pyntreikam ïa ka National Education Policy

Mawkyrwat, Jylliew, 13: Ka Sngap Syiem College, Mawkyrwat (SSCM) ryngkat ka jingïatreilang bad ka Rashtriya Ushatar Shiksha Abhiyan (RUSA), Cell Mawkyrwat mynta ka sngi ka la pynlong ïa ka jingïaphylliew jingmut ne ka One Day Workshop halor ka National Education Policy (NEP) 2020 hapoh ka Conference Room jong ka kolej ha kaba u Rakkam A. Sangma, Myntri ka tnad ka pule puthi jong ka Sorkar Meghalaya u la long kum u kongsan.
U Rakkam Sangma, Myntri ka tnad ka pule puthi jong ka Sorkar Meghalaya haba kren ha ka jingïalang u la ong ba kane ka long kum ka rynsan ha kaba kin ïamir ïa thaiñ halor ka jingpynkylla ïa ka pule puthi ha ka jylla lyngba ka jingpyntreikam ïa ka ‘New Education Policy’ ka ban wanrah ne kyntiew ïa ka pule puthi ha ka ri baroh kawei bad u pynpaw ruh ïa ka jingsngewkmen ban ïohi ba ki katto katne ki jaka pule ki la wan shakhmat na ka bynta ban pyntreikam ïa kane ka policy kaba thymmai.
Shuh shuh u la ong ba ngi im ha ka juk ha kaba tang uba bit tam un lah ban im namarkata, ki dei ban long kiba kloi ban pyntreikam bad ban mad ïa ki jingeh ha ka jingpyntreikam ïa kane ka NEP. Haba ban jur halor ka jingbun jong ki proh jabieng ha baroh kawei ka ri u ong ba kam don kano kano ka jingeh halor ka jingpyntreikam ïa kane ka NEP. Namarkata, u la khot bad wer ïa ki nonghikai ban bah shim ïa ka jingbahkhlieh na ka bynta ban wanrah ïa ki jingkylla ha ka pule ka puthi ha ka jylla da kaba pynmih ki proh jabieng ki ban kham tam ban ïa ki tiar jong ka juk mynta.
Ha kajuh ka por u pynkynmaw ïa ka kamram jong ki kum ki nonghikai halor kumno ban wanrah biang ïa ka nam kaba la duh noh ha ki por mynshwa ha kaba kiba nabar ki ju wan sha kane ka ri naka bynta ban pule. Shuh shuh u la ong ba ngin ym kiew lano lano lada ngi dang ïai pynneh ïa ka juh ka rukom pule ha ka jylla. U la pynpaw ïa ka jingdiaw halor ka jingjur kiba bun kiba pep skul shiteng por bad u kyrmen ba da kaba ngi pyntreikam ïa kane ka NEP kaba thymmai yn lah ban pyndonkam ïa ki sap ki phong bad ban pynkylla ïa kita ki sap ki phong sha kiwei pat ki jingmyntoi kiba lah ban kyntiew shuh ïa ka ri shajrong. U la kyntu namarkata, ïa ki nonghikai ban pynthymmai bad ban shimkhia ïa ka kam na ka bynta ka jingmyntoi uba bun balang bad ban lah ban noh synñiang sha ka imlang sahlang bad ka ri baroh kawei.
U bah Ambrose Ch. Marak, Secretary jong ka tnad pule puthi ha ka jingkren jong u, u la ong ba ka long kaba donkam ban sngewthuh ïa ki jingeh kiba kin hap ban ïaid lyngba ha ka jingpyntreikam ïa kane ka NEP. U la pynpaw ba ki bun ki jylla kiba la pyntreikam ia kane ka policy katba ngi pat ngin dang iaid shakhmat na ka bynta ban pyntreikam bad u ngeit ba lyngba kane ka rynsan yn lah ban ia mir jingmut halor kumno ban iaid shakhmat ha ka jingpyntreikam bad ki jingeh ki ba ngin hap mad halor ka jingpyntreikam ia ka National Education Policy.
U bah Renikton Lyngdoh Tongkhar, MLA Mawkyrwat Constituency ha ka jingkren jong u, ula pynpaw ia ka jingkyrmen ba lyngba ka jingpyntreikam ia kane ka NEP da kaba ngeit ba ka lah ban wanrah shibun ki jingkylla halor ban kyntiew ia ka pule puthi ha ka jylla. Ha kajuh ka por ula pynpaw ia ka jingsngew-sarong ban iohi ia ka jinglong kloi jong kane ka kolej ban pdiang ia ka jingpyntreikam ia kane ka NEP. Namarkata, u wer ïa ka jingkyrshan bad ka jingïatreilang na ka liang ki kmie ki kpa ha ka ban kyntiew shuh shalor ïa kane ka kolej da kaba pynshlur ïa ki ban phah pule ïa ki khun ha kane ka skul.
Katba ha ka jingkren jong u bah H.M. Shangpliang, u MLA barim bad mynta kum u Nongaibuid jong ka tnad pule puthi jong ka sorkar jylla u la pynpaw ïa ka jingsngewkmen ban ïohsngew ba kane ka kolej ka la lah ban pynpass bun ki khynnah bad ka la pyni ba ka la lah ban rah ïa u khynnah uba pass ha ka 3rd Division sha ka 1st Division. Haba ïaroh ïa ka jingtreishitom bad ka jingaiti lut jong ki nonghikai, u la kyntu ïa kiwei ruh ki skul ban bud ïa kajuh ka nuksa wat hapdeng ki jingeh ba ki ki mad.
Haba ïathuh halor ka jingpyntreikam ïa ka NEP, u bah Shangpliang u la ong ba kane kan wanrah shibun ki jingkylla ha ka liang ka pule ka dangle hapoh ka jylla bad ki jingeh kiba kin hap ban ïaid lyngba kin jah lut lada pyntreikam pura ïa kane ka NEP. Ula pynpaw ïa ka jingbynñiaw halor ka jingbun kiba pep skul shiteng por bad u ong ba donkam ban thaw ki lad ki lynti ban pynduna khnang ba kan ym wanrah jingeh ha ka imlang sahlang.
U bah Carness Sohshang, MDC ka Mawkyrwat Constituency, u bah R. Mawroh, Principle Consultant jong ka Directorate of Higher Technical Education (DHTE), Shillong, ki nonghikai kiba dei ki Principal, Vice – Principal, ki Headmaster bad ki Headmistress jong ki skul ha ryngkat ki dkhot jong ka Managing Committee kiba iadonlang ha kane ka sngi.
Hadien ka jingïalang la pynbud da ka Technical Session halor ar tylli ki phang kata ka ‘NEP2020: Role of Stakeholders’ ha kaba ka Prof. S. Sungoh, Professor jong ka Education Department, NEHU, Shilong ka la long ka nongbatai bad ka ‘Study Habit: Role of Institution’ ba la batai da ka Dr. Basancy Kharbuki, Assistant Professor, NERIE – NCERT, Umiam bad ka Dr. Balaiada Dkhar, Assistant Professor – NERIE – NCERT, Umiam.
U Dr. K.K. Nongsiej, Principal jong ka Sngap Syiem College, Mawkyrwat u la ai ki kyntien pdiang sngewbha bad ka kong M. Kharlyngdoh, Co-ordinator IQAC, Sngap College Mawkyrwat ka la pynïaid ïa ka jingïalang bad ai ruh ka jingkren ai khublei.