Wer u MLA Sohra ïa ki paidbah ban shim kabu ha ki Health Camp, ïaroh ïa ka District Health Society

Shillong, Nailur, 27: U MLA jong ka Sohbra u Bah Gavin M. Mylliem u la ïaroh ïa ka jingtrei shitom jong ka District Health Society bad ki seng kiba ïatreilang ban wanrah ïa ki jingshakri ba kyrpang ha ka koit ka khiah kaba kham jan sha ki paidbah ha ki jaka nongkyndong.
Haba kren kum u kongsan ha ka jingpynlong ïa ka Health Camp hapoh ka Swasth Nari, Sashakt Parivar Abhiyaan (SNSPA) ha Swer Primary Health Centre, East Khasi Hills District, u Bah Gavin u la ong, “ka koit ka khiah ka long kum u budlum jong ka imlang sahlang.”
U la pynpaw ruh ka jingsngewnguh ba ki tnad bad ki jaka treikam bapher bapher ki ïatreilang ban pynthikna ba ki jingshakri kiba bha kin poi sha ki paidbah, khamtam eh sha ki kynthei bad ki khynnah.
U la kyntu shuh shuh ïa ki paidbah ba kin ïashim bynta shitrhem ha kum kine ki sienjam bad ban pyndonkam pura ïa ki lad ki lynti ba la ai.
Ïa kane ka prokram la pynlong da ka District Health Society, National Health Mission (NHM), East Khasi Hills, Shillong ryngkat ka jingïatreilang bad ka BPMU-NHM bad ka Swer PHC. Kane ka health camp ka thmu ban pynkhlaiñ ïa ka jingpynpoi ïa ki jingsumar, ka jingkyntiew ïa ka jingïoh jingtip shaphang ka koit ka khiah jong ki longkmie bad ki khynnah bad ka jingpynthikna ba baroh ki ïoh ïa ki jingsumar ha ka imlang sahlang.
Kane ka health camp ka kynthup ïa ki jingïalang ai jingtip shaphang ka koit ka khiah bad ka jingbam ba tei met, ki jingpeit bniah da ki doktor, ki jingai jingmut na ka bynta ki longkmie bad ki khynnah kynthei kiba dang samla, ka jingïarap ban ai snam, ki jingpyni ïa ki mar bam ba tei met da ki Self-Help Group bad ka ICDS, ki jingïakop kylli jingkylli na ka bynta ki khynnah skul, ki jingïakop hapdeng ki khunlung, bad ka jingpynrung kyrteng ïa ki nongïoh jingmyntoi hapoh ka MHAAB. Kine ki sienjam ki la wanrah ïa ka jingmyntoi ha kaba ai jingtip ïa ka imlang sahlang bad ka jingkyntiew ïa ka jingïada ha ka koit ka khiah, ka jingtip shaphang ka bam ba tei ïa ka met bad ka jingïoh ïa ki skhim sorkar kiba ïadei bad ka koit ka khiah.
Ka Nazareth Hospital, Shillong ka la noh synniang da kaba la phah ïa ki doktor na ka bynta ban ai jingsumar ha ka health camp, kaba la plie lad ïa ki briew ha ka thaiñ ban ïoh ïa ka jingai jingmut jong ki riew shemphang. Na ka liang jong ka District Health Society ka la pynpaw ïa ka jingsngewnguh ïa kane ka Hospital kaba la ai ka jingïatreilang bad ka jingkyrshan ha ka ban pynlong ïa kane ka prokram kaba jop.
Ha kane ka prokram la ïashim bynta da u District Medical and Health Officer (DM&HO) Dr. E. Kharmutee, u Block Development Officer jong ka Laitkroh 12 Shnong u Bah W. Kharbuli, Dr. K. Kharnaior, Senior Specialist na Sohra CHC, Dr. R. Kyndiah, Senior Medical Officer bad Block Medical Officer ha ryngkat ki ophisar na ka tnad ka Koit ka Khiah, ICDS, MSRLS, tnad Pule Puthi, ki Self-Help Group, ki ASHA bad ki dkhot ka Health Committee jong ka shnong.
Ka Swasth Nari, Sashakt Parivar Abhiyaan hapoh ka National Health Mission ka dei ka sienjam ba kyrpang kaba peit bniah ïa ka jingpynpoi ïa ki lad ai jingsumar ba pura na ka bynta ki longkmie, ki khynnah bad ki longiing.
Kane ka kam, lyngba ka jingpynlong ïa kum kine ki camp ha ki jaka nongkyndong, ka thmu ban pyndap ïa ki jaka ba suda ha kaba ïadei bad ka jingïoh ïa ki lad ai jingsumar bad ka jingpynthikna ban wanrah ïa ki jingshakri kham jan ïa ki briew.