Nongpoh, Risaw 08: Ka ophis jong u District Sports Officer, Ri-Bhoi District ryngkat bad ka bor pynïaid district jong ka Ri-Bhoi kan sa pynlong ïaka jingmareh thong bala tip kum ka Fit India Swacchta Freedom Run 5.0 kum ka jingai mynsiem ïaki khun samla ha kane ka juk mynta ba kin pynmlien ïalade ban shimbynta haki kam kilan met bad ban im ka jingim kaba koit ba khiah.
Katei ka jingïamareh kan long haka 19 tarik Risaw naduh ka por 6 baje mynstep ka ban sdang naduh Ri Shat Sngi Orchid Resort Umiam haduh Meghalaya State Fisheries Research and Training Institute, Mawpun Kshaid haka jingjngai kaba 5 km naka bynta ki kynthei bad shynrang kiba 14 snem shaneng.
Kiba kwah ban ïashim bynta ha katei ka jingïa mareh thong kin hap ban register ïalade ha ophis u District Sports Officer, Ri-Bhoi District naduh ka por 10 baje mynstep haduh 4 baje janmiet bad ha Bhoirymbong C&RD Block haka 16 bad 17 tarik.
Naka liang ka ophis u DSO kala pynkhreh ruh ïaki song pisa sha ki nongjop bad kumjuh ruh ka khusnam kyrpang ïa u/ka nongïashim bynta bala rangbah tam kiba la palat 50 snem shaneng. Kumta naka liang u Bah Bobby L Nongbet u la khot bad wer ïa ki samla bad ki rangbah kynthei bad shynrang ba kin mih ryntih ban shim bynta lang ha katei ka sngi naka bynta ka khubor jong ka koit ka khiah bad ka tarik ba khatduh ban register ïalade ka long shuwa ba ka 18 tarik mynta u bnai.
