Jowai, Naitung 22: Ka Warjaiñtia Students’ Union (WjSU) ka khot sngewbha ïa baroh sha ka jingïalang ban ïakren khadduh, halor ka jingshna torti ïaka Synthetic Football Turf, ha Ladjaplem, Amlarem Civil Subdivision.
Ka WjSU kala kyrpad naduh ki Clubs, ki Rangbah Shnong bad kiwei kiwei ki riewpawkhmat ka thaiñ ba kin sngewbha ban pynlait por khnang ban wan sha ka jingïalang bala khot da ka seng ban pyrkhat lang halor kane kam.
Ïa kana ka jingïalang yn pynlong ha Dawlu Guest House Ladjaplem haka sngi Saitjaiñ jong ka 26 tarik u Naitung (July) 2025, ha ka por 10 baje mynstep.
Haka juh ka por la khot ruh ïa ki President/Secretary Club, kumjuh ïa ki Rangbah Shnong hapoh ka thaiñ ban wan shim ïa ka rai na ka bynta ban File da ka Public Interest Litigation (PIL) pyrshah ïa ka rukom shna ïa katei ka madan.
Na ka liang ka Seng kam kwah ba kane ka madan Synthetic Turf kan long thik kumba long ka Indoor Stadium kaba don syndah kane ka madan. Ka seng ka kyrmen skhem baroh kin wan sha kane ka jingïalang khnang ban ïoh shim ïaka rai kaba ïahun lang da baroh, na ka bynta ka jingbit jingbiang ki Sports Infrastructure hapoh ka thaiñ Warjaiñtia hi baroh kawei. Pynkut ka kyrwoh na u Everest Langstang uba dei u General Secretary ka WjSU Central Body Amlarem.
