Shillong, Naitung, 16: Ka Meghalaya Pradesh Trinamool Youth Congress ha ka sngi Thohdieng ka la khot bad wer ïa ki hajar ngut ki samla nongshong shnong jong ka jylla Meghalaya ban pynrung kyrteng ïalade sha ka Trinamool Congress na ka bynta ban wanrah ïa ki jingkylla hapoh ka jylla Meghalaya hadien ka elekshon 2023.
Kane ka jingkhot jingwer jong ki nongïalam samla ka Trinamool Congress ka long hadien ba ki la ïathir ïatai sani bha ha ka Executive Committee kaba la long ha ka ophis treikam jong ka seng.
“Ngi la sdang ka jingpynrung kyrteng na ka bynta ki samla hapoh ka Trinamool Congress khnang ban wanrah ïa ka jingkylla,’ ong u President ka MPTYC u Bah Fernandez S. Dkhar ha ka jingïakren bad ki lad pathai khubor.
U la ïathuh ba sha rilum Garo ka jingpynrung kyrteng ïa ki samla hapoh ka Party ka la nang ïaid shaid shaid bad shen yn sa pynsdang noh ïa ka jingpynrung kyrteng sa ha rilum Khasi bad Jaiñtia.
