Nongstoiñ, Jymmang 14: Ka Seng Khasi West Khasi Hills District lyngba u President Bah Rgh P.Ryntathiang, ka khot ka wer paidbah sha ka Shad Suk Mynsiem ka ban sa long naduh ka 25 tarik bad ha ka 26 tarik mynta u bnai ha madan New Nongstoiñ.
Ha u kyrwoh khubor, na ka liang u President u la ong ba kane ka Shad ka Kmen, ka long ka ka jingkynmaw bad jingai nguh u Khun Khasi Khara shi sien shi snem ïa u Blei Trai Kynrad U Nongthaw U Nongbuh na jrong na tbian, ban neh la ka hok ka riti.
La kyrpad bad khmih lynti ïa ki para kur para kha ban ïa poi lang ha kane ka Shad ka Kmen, ban ïa mih nongshad Kynthei bad Shynrang ryngkat ka riam ka beit pura, ban phuh ban phieng la kam ban sah pyrto junom la ka ri.
Ka jingsdang ban shad ban noh kjat ha ka lympung shad kan sdang naduh ka por 2 baje noh phai sngi ha ka sngi 26 tarik ha katei ka jaka ba ju pynlong man la u snem.
