Shillong, Jymmang : Ka Seng Khasi Lawbah, East Khasi Hills, kan pynlong ia ka Shad Suk Mynsiem mynta ka snem ha ka 6, 7 bad 8 tarik Jymmang 2022 ha Lympung Shad jong ka Seng kumba ju long.
Na ka liang ka Seng ka pynpaw ba kane ka shad ka dei ka shad ainguh ai dem ïa U Blei Trai Kynrad Nongbuh Nongthaw shisien shi snem halor ki jingkyrkhu ki ba u la theh ha ngi u khun bynriew.
Kumta na ka liang ka Seng Khasi Lawbah ha u kyrwoh lyngba u Rangbah K.Loniak Sawkmie, General Secretary ka khot ka wer sngewbha ïa baroh ki parakur parakha ki ba dang bat dang ksoh ïa ka niam tynrai ban ïa wan pynshit pynshngaiñ bad pynphuh pynphieng lem ïa kane ka shad, da ka jingïashim bynta ban ïa mih nongshad kynthei bad shynrang ha ryngkat ka riam tynrai paka.
Shuh shuh ka Seng ka pyntip ruh ba kan don ka jingïalehkai drama da ki khun samla jong ka seng ha ka miet 7 bad 8 tarik hapoh ïing Seng Khasi Lawbah, kumjuh ka jingpynburngia por ba don ka drama da ki nongshad na ki bynta bapher bapher jong ka ri khasi ha kine ki miet ba pynlong ïa ka jingïaleh drama.
