Nongstoiñ, Naitung 25: Ka Social and Economic Life Development Department (SELDD) jong ka Khasi Jaiñtia Presbyterian Synod Sepngi lyngba ka Agency for Sustainable Development Initiative (AfSDI), ka la pynbeit ban pynlong biang ïa ka Shillong Run-10 K, 2023 ha ka 12 tarik Nailar 2023 naduh ka por 5:30 baje mynstep ka ban sdang na Parking Lot, Polo.
Ka jingthmu jong kane ka prokram ha ryngkat ka phang pdeng, ‘Run with different abilities’, ka long ban pynsngew thuh ïa ki jingeh bad ïa ka jinglong ryngkat dor ki briew ba don jingduna ki dkhot. Kumjuh ruh, ban pynmih fund ïa ki project kiba ka Synod ka la seng na ka bynta ki khynnah kiba don ki jingduna ha ki dkhot met kata, ka Mairang Vidyajyoti Inclusive Secondary School, Mairang, Community Based Rehabilitation Centre, Mairang bad Rev. Amirkha School for Disabled, Mawlai.
Ka Shillong Run ka la sdang naduh 2011 haduh 2019 bad ha kine ki khyndai tylli ki snem kiba la dep ka jingpynlong ïa ka Shillong Run ka long kaba ïaid beit ïaid ryntih bad ki nongïashim bynta kiba kham bun ki dei ki khynnah skul, wat ki rangbah ruh ki ïashimbynta bha.
Naduh 2020-2022, ym shym la pynlong shuh ïa ka Shillong Run 10K, na ka daw jong ka khlam. Hynrei katba nang ïaid ki por, yn nang pynbha ïa ka Run na ka por sha ka por katba kum ka jingpynïaid Marathon.
Kino kino kiba don ka jingthmu ban ïashimbynta ki lah ban register/pynrung kyrteng ïalade ‘online’ da kaba shu scan ïa u ‘QR Code’ ïa u ba la buh ne pynrung ha ki Flyer bad ki Banner. Ban register/pynrung kyrteng ïalade ‘Offline’, ki lah ban leh ïa kata da kaba kin leit shim ïa ki Form na ka Ophis treikam jong ka KJP Synod Sepngi, Mission Compound Shillong. Kan sdang na Parking Lot, Polo ka ban kot haduh 10 KM bad ïa ki lynti bad ki jingkdew yn sa batai da ki nongpynïaid ïa ki nongïashim bynta.
Kan don ruh ka khusnam ïa ki nongjop da ka song pisa bad kumjuh ki consolation prize na ka bynta ki top 7 bad sam medal sha baroh ki nongwan ïashim bynta bad ïa ki T-shirt yn ai sha ki nongwan ïashim bynta kat kiba kloi.
Ïa ki bib number yn sam da ka ophis jong ka KJP Synod Sepngi ha Mission Compound marjan ka KJP Girls Higher Secondary School ha ka 10 bad 11 tarik u Nailar kata naduh kapor 11 AM haduh 5 PM
ïa ki jingtip ba kham bñiah la kyrpad ruh ban peit na ka website www.afsdi.com lane phone ruh ha u Director SELD- +918787545266, +91 8974026462 & 9856985092, +91 9436557222.
