Khliehriat, Naitung, 18: Kumba ju long manla u snem, ka Seiñ Raij Tuber mynta u snem ka la bad bad wer ïa baroh ki paidbah ban sakhi ïa ka lehniam Behdieñkhlam kaba heh tam ha Meghalaya ïa kaba la jer kyrteng kum ka ‘The Biggest Environmental Raij Tuber Behdieñkhlam Festival 2025 ka ban sdang naduh ka 19 tarik bad ban sa pynkut ha ka 22 tarik, Naitung 2025.
Ia kane ka Behdieñkhlam ban sa pynlong ha ka pung Aitnar ha Tuberkmaishnong, East Jaiñtia Hills District, ka Seiñ Raij Tuber ka khot sngewbha ïa baroh khamtam ha ka sngi kaba yn pynkut ïa ka jinglehniam Behdieñkhlam kaba mynta u snem.
U President ka Seiñ Raij Tuber Bah HelpingPhawa u la pyntip ba ha ka sngi pynkut ïa ka jinglehniam Behdieñkhlam yn sa don lang ruh ki Myntri Sorkar, ki MLA, MDC, ki Syiem, ki Dolloi, ki President bad Secretary jong ki tnad seng bapher bapher bad ki riew pawkhmat.
Kum ka jingpynbna, yn ym shah ïa ki nongdie jingdie ba kin die ïa ki mar ki mata ne kino kino ki jingdie harud ka surok ne ka lynti iaiad kjat ban leit sha ka pung Aitnar. Kino kino kiba die jingdie ki hap ban da ïoh bor shwa na ka Seiñ Raij Tuber bad na ka Dorbar Shnong Tuberkmaishnong khnang ba kan ym pynthut ne pynwit ïa ki lynti ki syngkien ba ïaid paidbah.
U Waheh Shnong ka Tuberkmaishnong Bah Jiedlang Sana u la pynbna ba baroh kiba die dukan kin shong shi jaka ha phyllaw bad ha madan jong ka ïing skul Seiñ Raij Tuber Higher Secondary School, Tuberkmaishnong.
