Jowai, Nailar, 24: Ka Jaiñtia Students’ Movements (JSM) lyngba u President u Bah Leningstar Rymbai ka khot sngewbha ïa baroh ki nongshong shnong hapoh ka Laskeiñ Block bad na kiwei kiwei ki shnong ban wan sha ka jingïalang paidbah ban pynsngew sha ka Sorkar Jylla na ka bynta ban ai Civil Sub-Division Civil ïa ka thaiñ Laskeiñ.
Ïa kane ka jingïalang paidbah yn pynlong ha ka 30 tarik mynta u bnai ha ka por 10:00 baje mynstep ha madan phutbol Mukhap, Laskeiñ Block, West Jaiñtia Hills District.
Ka jingthmu jong kane ka jingïalang paidbah ka long na ka ban pyni pyrthei ïa ka sur jong ka jingtylli ban dawa jur na ka Sorkar halor ka jingdonkam jong ki paidbah Lakseiñ Block ïa ka Civil Sub-Division.
Ka JSM ha ryngkat ka jingïatreilang bad ki paidbah nongshong shnong ka Laskeiñ Block ka khot sngewbha ruh ïa kino kino ki kynhun treimon sngewbha kiba najan bad najngai, ki Dorbar Shnong hapoh ka Laskeiñ Block, ki paidbah nongshong shnong, ki sengbhalang, ki riewkhraw pynkhat, nalor ki nongmihkhmat bad kiwei de ban ïadon bynta lang ha kane ka jingïalang.
