Jowai, Nailar 02: Ka Behdieñkhlam Joint Committee, jong ki hynriew tylli ki Seiñ Raij, ha ka jingkren sha ki lad pathai khubor mynta ka sngi Saitjain 2.8.2025, ki la ong ba ki la khot sngewbha ïa u Dr Sukanta Majumdar, myntri sorkar pdeng jong ka kam pynroi ka thaiñ shatei lam mihngi ban long kum u kongsan ha ka lehñiam shad Behdieñkhlam jong ka Seiñ Raij Mukhla ha ka 31 August 2020.
U ma Phrangki Pale, Convener ka Behdeiñkhlam Joint Committee, ula ong ba “kane kan long ka sien kaba nyngkong ba u myntri sorkar pdeng un sakhi ïa ka shad Behdieñkhlam ha ki thaiñ nongkyndong.
Ka long ruh ka jingsngew sarong lang na ka bynta ki hynriew tylli ki Seiñ Raij hapoh Ri Lum Jaiñtia kiba kynthup ïa ka Mukhla, lalong, Tuber, Muthlong, Sohkymphor bad Chyrmang ba u Myntri Sorkar ba la kdew haneng u la pdiang ïa ka jingkhot jong ki ban wan sakhi ïa ka shad Behdienkhlam ka Seiñ Raij Mukhla kum u Kongsan ha ka sngi babha.
Ka jingwan jong u myntri sorkar pdeng sha ka shad Behdieñkhlam kan don ka jingkyrkhu namar ha kaba pyni ïa ka tamasa jong ki sha ka ri India baroh kawei bad khamtam eh sha ki paidbah ka West Bengal, namar ba une u nongïalam un don shibun ki nongbud na la ka jong ka jylla. Na ka liang ki dkhot ka Committee ki kyrmen ba ki nongjngohkai pyrthei na West Bengal khamtam kin wan bun sha kine ki tamasa Behdeiñkhlam hapoh ka jylla Meghalaya.
Ki la ong ruh ba naduh u snem ban wan, ka Committee kan sa pynphriang ïa ka Calendar jong ki Tamasa jong ka jaitbynriew Jaiñtia ban ïarap ïa ki nongjngohkai pyrthei kiba thmu ïa ka jingleit shuti jong ki sha Meghalaya ha ka por tamasa.
Shuh shuh ka Committee ka kyrpad ïa ki bor pynïaid District, ka tnad Pulit bad kiwei ki tnad Sorkar ba kin ai ka jingkyrshan ïa kine ki tamasa ha la ka jong ka jong ka rukom. Ha kajuh ka por la kyrpad ia ki nongshong shnong ka jylla bad kiwei ba kin sakhi ïa kane ka lehñiam Behdieñkhlam khlem da kheiñ jingïapher ïa ka ñam ka rukom, ka jait ne ka jingngeit.
Khatduh eh, ki pyntip ruh ba ki la buh ruh ka kyrpad ïa u MOS ban plie ïa ki Cultural Infrastructure jong ki hynriew tylli ki Sein Raij, ïa kaba la ai da ka North Eastern Council, Ministry of Development jong ka thaiñ shatei lammihngi ha kaba kot haduh 1.93 klur tyngka.
Shuh shuh ki la pyntip ruh ba ki Lehniam Shad Behdeiñkhlam kiba dang long ki dei jong ka Seiñ Raij Ialong ka ban long ha ka 07.08.2025 tarik, Seiñ Raij Ialong Muthlong ha ka 08.08.2025 tarik, Seiñ Raij Sohkymphor ha ka 16.08.2025 bad Seiñ Raij Mukhla ka ban long ha ka 31.08.2025.
