Shillong, K’lyngkot, 19: Ka kynhun ki nongïalam ka BJP Meghalaya State Unit ba la lamkhmat da u President u Rikman G. Momin bad u Bah Alexander L. Hek ha ka sngi Thohdieng ki la ïakynduh ïa u Archbishop jong ka Shillong Archdiocese u Most Rev. Victor Lyngdoh ha Archbishop’s House, Laitumkhrah bad aiti ha u ïa ka Revered Akshat bad ïa ka shithi khot sngewbha na ka bynta ka jingplie paidbah ïa ka Shree Ram Mandir.
Ha u kyrwoh ba la phah sha ki lad pathai khubor, ka BJP ka la pyntip ba u Archbishop Victor Lyngdoh u la pynpaw ba un sa leit jngoh ïa ka Ram Mandir ha Ayodhya bad ai ruh ka jingkyrkhu kyrdoh na ka bynta kane ka jingthmu.
Ha kane kajuh ka sngi, ki nongïalam ka BJP ki la ïakynduh ïa u Myntri Rangbah u Conrad Kongkal Sangma, ïa u Symbud Myntri Rangbah u Bah Prestone Tynsong bad ïa ki Myntri Sorkar ban khot sngewbha ïa ki sha ka jingplie paidbah ïa ka Ram Mandir ha ka 22 tarik mynta u bnai.
