Wengnoh mardor ïa u DC ka WGH na ka jinglong principal secretary GHADC, dawa ka MPYC

Shillong, Risaw 17: Ka Meghalaya Pradesh Youth Congress (MPYC) ka la dawa ïa ka sorkar jylla ba kan wengnoh ïa ka rai ban thung ïa u deputy commissioner ka West Garo Hills u Vibhor Aggarwal kum u principal secretary jong ka Garo Hills Autonomous District Council (GHADC).
“Ngi pynrem jur ïa kane bad ngi dawa ba ka sorkar ka dei ban wengnoh ïa kane ka rai mardor bad ban wanrah biang ka bor kaba pura kaba long laitluid ïa ka GHADC kaba long ruh katkum ka mynsiem ka Sixth Schedule,” ong u President ka MPYC u Timjim K Momin ha ka kyrwoh khubor ha ka sngi Thohdieng.
Katkum ka jingong jong u Momin, kane ka jingleh ka long kumba thombor beit beit ïa ka mynsiem bad ka jingthmu jong ka Sixth Schedule ka riti synshar ka ri kaba dei ka jingai jingïada kaba kongsan tam kaba la thaw ban ïada ïa ki hok, ki jingithuh bad ka synshar dalade jong ki riewlum kane ka thaiñ shatei lammihngi ka India.
“Ka dei ha ka por jong ka sorkar Congress ba la wanrah ïa ka Sixth Schedule, kaba la ithuh ïa ka jingdonkam ban pynneh ïa ka kolshor kaba kyrpang, ka riti dustur bad ka jingsynshar da ki kynhun riewlum bapher bapher. Kaba sngewsih ka long ba ka sorkar ba la ïalam da ka NPP mynta ka pyrshang ban pynhiar dor bad ïaid lait ia ka nongrim ba kongsan jong ka Sixth Schedule. Da kaba buh ïa u Deputy Commissioner uba dang shakri kum u officer ka State administration ba un khmih ïa ki kam ka GHADC, ka sorkar NPP mynta ka la wanrah ïa ki rukom treikam ka Council hapoh ka jingpynïaid ki ophisar, ha kaba kane ka long ka jingpyrshang ban phiah lyngkhot lyngkhai ïa ka jinglong kongsan ka Sixth Schedule na Garo Hills,” u la ong.
Ka MPYC ka la pynpaw ruh ïa ka jingbym sngewhun ïa ka rukom treikam ka Executive Committee ka GHADC, kaba pyni ïa ki jingbym lah jong ka ban pynïaid bha ïa ki kam ka Council kaba la lam sha ka jingshah pynïaid bad tuklar jong ki ophisar.
“Lada kane ka EC ba mynta kam lah ban pynïaid bha ïa ki kam ka Council, la dei ban pyndam bad ban wanrah bujli ïa ki nongïalam kiba burom ïa ka Constitution bad ki hok jong ki paidbah,” bynrap u Momin.
“Ka Sixth Schedule kam dei tang ka aiñ, ka dei ka jingim jong ki kam synshar ïalade jong ki riewlum bad ka jingïoh jingithuh ïa ki. Kano kano ka jingpyrshang ban pyntlot ïa ka, kan kynduh bad ka jingpyrshah kaba khlaiñ na ki paidbah jong ka Garo Hills bad ka Youth Congress,” u la bynrap.