Shillong, Nailar 21 : Ka Khasi Hills Autonomous District Council (KHADC) ka la weng shipor ïa u Paiem Nangtei Sing Syiemiong kum u Syiem ka Hima Langrin hadien ba ka la don ka jingujor pyrshah ïa u.
Haba kren bad ki lad pathai khubor ha Shillong Press Club, u president ka Seng Samla Hima Langrin Bah PS Lyngdoh u la ïathuh ba ïa ka jingtreikam ha ka Hima yn peit shipor da ka KHADC.
Katkum ka jingïathuh jong u, katei ka rai ba ka KHADC ka shim ban weng shipor ïa u Paiem Nangtei naka khet kadei hadien ba ka Seng Samla Hima Langrin ryngkat ki khun ki hajar ki la ujor pyrshah ïa u Syiem sha ka KHADC halor ka jingpyndonkam bakla jong u ïa ka bor.
U la ong ruh ba ki khun ki hajar ki la lap ba ka don ka jingbym beit ïa ka rukom lum khajan bad ka jingbym ryntih ha ka rukom pynïaid kam hapoh ka Hima.
