Imphal, Rymphang 4: Ka tnad kam poh ïing ne ka (Ministry of Home Affairs) jong ka sorkar pdeng ka la pynmih ïa ka jingpynbna ban weng noh ïa ka President’s Rule hapoh ka jylla Manipur bad kane ka jingpynbna kan trei kam noh mardor.
Kane ka la wan tang katto katne kynta shwa ka jingpynsmai ïa ka sorkar thymmai ha Manipur kaba la buh ban long mynta ka janmiet sngi Balang.Ki MLA jong ka National Democratic Alliance (NDA) ba la ïalam da ka BJP, ki la thmu ban shim smai pura hapoh ka jingïalam u Myntri Rangbah ka Jylla, u Yumnam Khemchand Singh ban thaw sorkar.
U Khemchand Singh u dei na ka jaidbynriew Meitei.Ki arngut ki symbud Myntri Rangbah ba la jied – u Nemcha Kipgen bad u Losii Dikho – ki mih khmat ïa ki jaitbynriew Kuki bad Naga.
U MLA ba hynniew sien jong ka Bishnupur district u Govindas Konthoujam u la ong ba la aiti ha u ïa ka tnad kam Home.
“Ngan shim khia ban shakri ïa ka Manipur da ka jingkit khlieh, bad ka jingaiti lut na ka bynta ka jingshong suk shongsain jong ki paidbah”, u la ong.
Katkum ka jingpynbna kaba la pynmih ha ka Gazette of India (Extraordinary), ka President ka Droupadi Murmu ka la weng noh ïa ka Proclamation kaba la pynmih katkum ka Article 356(2) jong ka riti synshar ka ri ha kaba ïadei bad ka Jylla Manipur.
Katei ka hukum, kaba la pynmih ha ka 4 tarik u Rymphang, 2026, ka weng noh ia ka Proclamation kaba la pynmih kham mynshwa ha ka 13 tarik u Rymphang, 2025, kaba la buh ïa ka jylla hapoh ka jingsynshar President rule.
“Ha kaba pyndonkam ïa ki bor ba la ai da ka kyndon (2) jong ka Article 356 jong ka Riti Synshar, nga… pyndam noh ïa ka Jingpynbna ba la pynmih… ha kaba ïadei bad ka Jylla Manipur kaba sdang naduh ka 4 tarik u bnai Rymphang, 2026,” ong ka jingpynbna.
