Nongstoiñ, Risaw 14: Ka Seng Khasi Students Union West Khasi Hills District Unit, ha ka jingïalam u Samla John Fisher Nongsiang President, ha ka sngi nyngkong jong ka taiew ka sngi ka la leit ban ïakynduh ïa u Deputy Commissioner, ryngkat ka jingthoh halor ki mat kiba ïadei bad ka jingpynbeit bad pynbha ïa ka thungkam thungkam lyngba ka District Selection Committee.
U President ka Seng u Samla John Fisher Nongsiang u la ong ba ka Seng ka leit ban buh bad dawa na u DC halor ki 17 tylli ki mat jingdawa, ba ka DSC ka dei ban pynrung ne pyntreikam ïa kitei ki mat khnang ba ka jingthung kam thung jam kan long kaba khuid bad kaba ïaid beit ïaid ryntih.
Ki mat kiba kham kongsan eh ka long ba ki dkhot hapoh ka DSC ki dei ban long da ki briew kiba la nang la stad. Ym dei ban thung da ki briew ba la jied da ki seng saiñ pyrthei, nangta dei ban da buh kor cctv camera ha ki jaka thoh eksamin, ban pynduh noh ïa ka personal interview ïa ki post kiba rit. Ban ym ailad shuh ïa ka jingthungkam sop sop da ki ophisar ha ki tnad sorkar, ban pyni paidbah ïa ki marks ba ïoh da ki candidate kiba wan thoh eksamin.
Ka KSU ka la dawa ruh ban ai jingkhein ïa ki jingdon jingem jong ki dkhot ka DSC kaba katkum ka Meghalaya Public Servants (Furnishing of Information and Annual Return of Assets and Liabilities and the Limits of Exemption of Assets in Filing Returns) Rules, 2016, ki nongthep kam DSC ha Khasi Jaiñtia ki dei ban nang bad tip ïa ka ktien Khasi.
La dawa ruh ban buh lypa ïa ka por ne u bnai jong u snem ban pynïaleh eksamin DSC, ban nym pynkylla ïa ki Roll Numbers jong ki kyrtong katba dang ïaid ka selection process. Kumjuh ruh ban da ai ia ka Carbon copy jong ki OMR sheet ha ki nongiakhun DSC.
Nalor nangta ban pyndep ia ka Recruitment Process hapoh 6 bnai hadien ba la dep pyllait paitbah ïa ki advertisement, ban don ia ka Annual Report jong ka DSC, ban pynthikna ba kan nym don ka jinglait tuh ki jingkylli, ban thaw ïa ka Grievances Cell hapoh ka DSC, ban leh Computer Based Test ha ki por ban wan hapoh ka DSC.
