Shillong, Naitung 21: Hadien ka jingkren tyngeh jong u Lat ka jylla, u Satya Pal Malik, ka sorkar mynta ka sngi, ka la sei ïa ka pisa kaba 122 Klur tyngka na ka bynta ban siew ïa ka tulop kaba saw bnai jong ki 12, 541 ngut ki nonghikai skul Sarva Shiksha Abhiyan (SSA).
Kane ka rai ka la mih hadien ba u Myntri Rangbah Symbud, u Bah Prestone Tynsong, u la khot ïakren ïa ki nongïalam jong ka Seng ki Nonghikai Skul SSA kiba la shong ïakhih haduh saw sngi lai miet hajan Additional Secretariat.
Kane ka pisa ka long 44 klur na ka tnad pule puthi kaba la pyllait mynta ka sngi hi bad 78 klur pat yn nang shim na ka Corpus Fund jong ka sorkar jylla, ïa kaba yn sa thep noh hadien ba ka sorkar jylla ka ïoh ïa ka adhoc grant kaba sei ka first installment na ka sorkar India. Kane ka pisa kan dap na ka bynta saw bnai shuwa na kaba ki Nonghikai kim shym la ïoh bad kaba sah shi bnai pat yn pyllait tang shu ïoh ïa ka pisa na ka sorkar India. Halor ka jingdawa ban kyntiew ïa ka tulop jong ki, u President jong ka Meghalaya SSA Schools Association, u Bah Aristotle Rymbai, u la ong ba ka sorkar kan sa buh kum kawei na ki mat jingïakren ha ka State Education Commission, ïa kaba ka sorkar kan sa thung shen ban ïakren lut ïa baroh ki jingeh jong ki nonghikai, ki skul bad kiwei kiwei de ki mat kiba ïadei bad ki nonghikai.
Na ka bynta ka jingslem ka tulop jong ki nonghikai, u Bah Aristotle u la ïathuh ba ka sorkar ka la pynbeit ba nangne shakhmat kan siew beit shisien shi quarter ne shisien lai bnai.
Ha kajuh ka por u nongïalam jong ka Seng ki Nonghikai skul SSA u la ïathuh ba na ka liang u Myntri Rangbah, u Conrad Sangma bad u Myntri Rangbah Symbud, u Bah Prestone Tynsong kin leit sha Delhi ban ïakynduh ïa ki heh jong ka sorkar pdeng kiba dei peit ïa ka tnad pla tyngka bad pule puthi ba kin pynsted ban pyllait noh ïa ka first installment jong ka pisa ki nonghikai skul SSA.
Hadien ka jingïakynduh bad u Myntri Rangbah Symbud ryngkat ka jingïadon lang ki ophisar jong ka tnad pule puthi ka jylla, ki nonghikai ki la pynlong ïa ka jingïalang ha ka jaka ba ki ïakhih bad ki la shim ïa ka rai ban weng noh ïa kane ka jingïakhih ban leit phai noh sha ïing bad sdang noh ïa ka jinghikai ha ki skul ba ki don.
