Weng kam, pynngat kyndon ïa ki Pulit ba siat ïa u Bah Chersisterfield : Ka Sur Ki Nongmawlai

Shillong, Nailur 13: Ka Sur Ki Nongmawlai ha ka sngi Ba-ar ka la dawa ïa ka sorkar MDA ba la ïalam da ka NPP ba ka dei ban weng kam bad pynngat kyndon ki kam runar pyrshah ïa ki Pulit kiba donkti ban siat ïap ïa u Bah Cheristerfield Thangkhiew ha ka ïing sah jong u ha ka 13 tarik jong u snem ba la dep ha Mawlai Kyntonmassar.
Haba kren sha ki lad pathai khubor kine ki nongïalam ka Sur Ki Nongmawlai ki pynsngew ïa ka jingpyrshah ïa ka rai ka sorkar ban shu khot hajir shuwa ïa ki pulit kiba don kti ban leit hiar khynra ïa ka ïing u Bah Cheristerfield bad kiba don kti ruh ban siat ïap ïa u wat hadien ba ka kynhun tohkit laitluid ba la khlieh da u Justice T Vaiphei ka la lap ba dei ka jingpyndonkam palat pud ïa ka bor, ba sa jia ka jingshah siat ïap u Bah Che
U samla Rapborlang Nongrum uba dei ruh u General Secretary ka KSU Mawlai Circle u la ong ba ha ka jingshisha ka sorkar ka dei ban weng kam wut wut bad ban pynngat kyndon ïa ki pulit kiba don bynta ban leit khynra ïa ka ïing ka sem u Bah Cheristerfield ym ban dang khot hajir wat hadien ba la pyni shai ba dei ki pulit kiba la pyndonkam palat pud ïa ka bor. “Kumba ka la leh ïa ki nongap pahara jong ka Jowai District Jail hadien ba ki 6 ngut ki runar ki la ïoh ban phet tuh na kane ka phatok, khlem khot hajir ka weng kam bad pynshitom ka dei ruh ban leh ïa kito ki pulit ba don kti ha ka 13 tarik” u la ong.
“Lada dei ba ka sorkar ka suba ba u don kti halor ka kam be-aiñ kumba ka la kynnoh ka dei ban khot hajir ban ïoh ki sabut ym ban leit siat ïap ha ka por mynmiet mynsynïa” u la ong
U la ong ba kane ka jingkynnoh ka sorkar kan shu sah umndum namar u Bah Che u la ïap ban ai sakhi ïa kane ka jingkynnoh ki pulit bad ka sorkar la kaba shisha ne kaba shu thaw.
Haba byrap lang ïa kane u Bah Khrawkupar Nongsiej President ka FKJGP Mawlai u la ong ba ka sorkar bad ka tnad pulit hi naduh kaba sdang la paw ka jingbym pat tbit ka jingleit khynra ban kem ïa u Bah Che wat hadien bun katto katne sien ba ki la ïa syllok para ma ki.
“Ha ka por miet ki la hiar leit khynra ki leit beit khlem don tang ki Night Vision Devices ne khlem rah torchlight hynrei kim rah satia ïa kane ruh bad ki shu siat beit da kaba pyrkhat ba dei kita ki lehnoh ba wan rieh tngen ha ka ïing u Bah Che, mutdur lada dei ki khun ne ka lok u Bah Che ba leit tur hadien ba ki pulit ki wan khynra ha kato ka step” u la ong.
U la ong ruh ba kaei kaba la jia ha kato ka sngi ka dei namar ka kynhun syntiat ka sorkar ka la fail namar ki kynnoh ba u Bah Che ryngkat u para nongïatreilang ki don lang ha ka juh ka jaka bad ki suba ba don ar tylli ki ïing kaba ki la thiah “wat hadien ba la ki la dep suba hynrei balei kim lah ban wad jingtip kaba thikna bad kane ka pyni ba ka tnad inteligenc ka sorkar ka fail” u la ong.
Haba ïadei bad ka jingbym pynmih ka sorkar ïa ka kyrteng ki Pulit ba don bynta ha kane ka jingleit khynra u la ong, “Kumba ka ïing ka la hun namar ki tip mano ba donkti ngi ruh ngi sngew ïahap ïa kata namar lada pynmih paidbah ïa ka kyrteng jong ki ïoh kan buh jingma ïa ka jingim jong ki namar kane kaba la leh da u Justice Vaiphei ka dei tang ka jinglap na ka jingtohkit ne ka kaiphot kam pat dei satia ka rai kut ne verdict bad kumba ka ïing ka dawa ban pynngat kyndon noh ïa ki pulit ba wan khynra bad siat ïap ngi ruh ngi ïeng skhem lang ha kata hi ka nongrim” u la ong.
Kumban shu pynkynmaw hangne ba na ka liang ka sorkar ha ka sngi Thohdieng ka la rah sha ïing dorbar thaw aiñ bad pynlait paidbah ruh ïa ka kaiphot siat ïap u Bah Che kaba la aiti da ka kynhun tohkit laitluid ba la khlieh da u Justice T Vaiphei kaba la thung da ka sortkar ban tokit halor ka jingshah siat ïap u bah Cheristerfield Thangkhiew uba dei nongïalam barim ka HNLC.