Shillong, Naiwieng, 17: Ka National People’s Party (NPP) ka la weng noh ïa ka jingkyrshan na ka Sorkar ba la ïalam da ka BJP ha ka jylla Manipur, da kaba ai daw ïa ka jingbym hun halor ka jingbymlah ban tem ïa ka jingïakynad jaidbynriew bad namar jinghiar arsut ka shongsuk shongsaiñ katba nang mih ki sngi.
Ka BJP ka dang don hi ha ka jingbun paid namarba ka ïoh jingkyrshan jong ki seng riewlum.
Ha ka shithi ba la phah sha u National President jong ka BJP u JP Nadda, ha ka sngi u Blei, u National President jong ka NPP u Conrad K Sangma uba long ruh u Myntri Rangbah ka jylla Meghalaya u la pynbna ïa ka rai jong ka party ban weng noh ïa ki hynñiew ngut ki MLA ka NPP na ka sorkar synrop.
Lyngba kane ka shithi u Sangma u la pynpaw ‘ïa ka jingsngewkhia kaba jur’ halor ka jingbym lah jong ka Sorkar u N. Biren Singh ban wanrah biang ïa ka shongsuk shongsaiñ hapdeng ki jingïakynad bad ki jingïaumsnam kiba dang ïai jia manla ka sngi.
“Ka jinglong jingman ha ka jylla Manipur ka la nang jyrwit jyrwat haduh u pud bym lah shuh ban tehlakam, nalor ka jingduhei jong ki mynsiem briew bad ka jingïakynduh jingeh jong ki kynhun jaidbynriew. Ngi ngeit skhem ba u nongïalam ba mynta u la phiel ban tem ïa kine ki mat kiba ktah haduh katta katta,” la pynpaw shuh shuh u Sangma ha ka shithi.
Watla hadien ba ka NPP ka la weng noh ïa ka jingkyrshan ai jingkyrshan jong ki hynñiew ngut ki MLA, hynrei ka Sorkar BJP ha Manipur ka dang skhem. Da ka jingïoh ïa ka jingbun paidbah kaba 37 ngut ha ka Ingdorbar Thawaiñ kaba don 60 ngut ki dkhot, ka BJP ka don 31 ngut ki dkhot.
Nalor kata, ka BJP kan dang ïoh ruh ïa ka jingkyrshan na ki seng riewlum bad na ki MLA Independent ba kynthup ïa ka Naga People’s Front (NPF) kaba don san ngut ki MLA, uwei u MLA ka JD(U) bad lai ngut ki MLA Independent.
Ka NPP, ka dei kaba don bynta lang ha kaba thaw ïa ka sorkar synrop namarba ka don hynñiew ngut ki MLA.
Ka Minipur ka la nang ïai pluh haduh mynta mynne namar ka jingïakynad jaidbynriew kaba ka pynkylla phetwir ïa ki phew hajar ngut ki paidbah nongshong shnong.
