Weng ka Executive Dorbar u Syiem Hima Maharam ïa ka jingthmu ban ai jaka ïa ki BSF ha Photmula
Mawkyrwat, Risaw 19: Hadien ka jingïakhih kaba la kumba neh ar bnai eiei da ki sengbhalang bapher bapher ryngkat ki nongïalam jong ki Shnong, ka Farmers Areas Association, ki khun ki hajar ka Hima Maharam ka thain khappud hapoh ka South West Khasi Hills District na ka liang u Syiem bad ka Executive Dorbar jong ka Hima Maharam ki la rai ban weng noh ïa ka jingthmu ban ai jaka sha ki shipai BSF ha Sohboitram, Photmula kaba don ha ki thaiñ Ranikor.
Haba kren sha ki lad pathai khubor, u President jong ka KSU South West Khasi Hills District Bah Forwardman Nongrem u la ïathuh ba ka Executive Dorbar jong u Syiem ka la shim ïa ka rai hadien ba ki la ïa shong ïa ka Dorbar ha ka 29 tarik, Nailur, 2025 ba ki la shim ïa ka rai ban pynkut noh ïa ka jingthmu.
U la ai khublei ba kyrpang ïa baroh kiba la don kti lang ha ka ban ïeng ïaleh pyrshah ïa ka jingthmu jong u Syiem ka Hima Maharam ban ai jaka sha ki shipai, kata naduh ka KSU, ka Synjuk ki Seng Samla Shnong, ka HNYF, ka HANM, ka HYC, ka FKJGP, ka HITO, ka Ranikor Farmers Areas Association, ki khun ki hajar ka Hima Maharam jong ka Border Area bad kiwei de ba kynthup ruh ïa ki Myntri bad ki Lyngdoh namar dei lyngba ka jingïatylli jong ki ba ki poi sha ka thong jong ka jingjop.
U la pynkynmaw ruh ba na ka liang ki Myntri Shnong ruh ki la lum ruh ïa ka jingïalang ha ka 24 tarik, Nailur, 2025 ha kaba ki la shim ïa ka rai ba tyngeh bad pynbor ruh ïa u Syiem ba u dei ban pynkut noh ïa kane ka jingthmu ban ai jaka sha ki shipai BSF bad kumta dei lyngba kane na ka liang u Syiem u la sngap bad lum ruh ïa ka Executive Dorbar jong ka Hima ban rai kyrpang ba la pynkut ïa kane ka kam bad ka jingthmu.
Kawei pat ka rai ba ka KSU bad kiwei ki kynhun sengbhalang ka South West Khasi Hills District ki la shim ka long ban ïai pyrshah ïa kino kino ki riewshimet, ki Kur ne Hima lada ki lilam ïa ka khyndew Hima sha kiwei pat ki briew.
Ym tang kata, ki la shim ruh ïa ka rai ban dawa ban pynbeit thymmai ïa ka Khasi Hills Autonomous District (Nomination and Election of the Syiem, Deputy Syiem and Electors of Hima Maharam) Act 2006 bad ruh ban ïai peitngor ba ka khyndew Hima ka dei ban ïada ba kan ym syntuid noh sha ki nong-wei nong-ar nangne shakhmat.