Watla ym pat ïoh jingthoh halor ka SIR, pynkhreh ka tnat Elekshon ïa ka jingpynrung kyrteng thep vote

Shillong, K’ Lyngkot 25: U Chief Electoral Officer ka jylla Meghalaya u Dr. B D R Tiwari la ong ba haduh mynta kim pat ïoh ïa kano kano ka jingthoh na ka Election Commission jong ka Ri India ha kaba ïadei bad ka Special Intensive Revision (SIR) ha kaba ïadei bad ki nongthep vote.
Wat la ïa ka jingthoh ym pat ïoh ban pynlong ïa jingpynrung kyrteng kaba bniah ha ka electoral roll, hynrei ka jingpynkhreh na ka bynta kane ka la ïaid ha baroh ki District ha ka jylla ha kaba ka la don ka jingkhot ïa ki seng saiñ pyrthei ban ïa mir jingmut ha kaba ïadei bad kane ka SIR.
Lah ban ong ba ka ophis jong ka tnat election ruh ka la buh ïa ka kyrteng jong kito kiba la don ha u snem 2005 ba ki paidbah kin ïa peit lem ïa kane ka bynta ban pynthikna ba tang ki nongshong shnong ka Ri India kin ïoh ban rung kyrteng ban ïoh thep vote.
Kumba ka long mynta na ka liang jong ka tnat election ka la dep ban pynkhreh ïalade na ka bynta kane ka kam ban pynlong ïa ka SIR ha kane ka jylla Meghalaya bad kaba sah mynta ka long ban shu ap ïa ka jingbtah na ka ECI ha kaba ïadei bad kane ka kam.