Watla ym don shuh ka kñia ka khriam, riewspah ha ka kolshor, ki shad bad riam tynrai ha ka Shad Sajer ka Raid Nongpoh

Nongpoh, Lber 28 : Sa shisien pat ki khun ki hajar jong ka Raid Nongpoh mynta u snem ki la kiew biang sha u Lum Wortoh ban sakhi ïaka tamasa Shad Sajer kaba ju pynlong shisien shisnem da ka Dorbar Raid Nongpoh, watla ha kane ka jingshad sajer ka kñia ka khriam kam don shuh, hynrei la sakhi ïaka jingriewspah ki kolshor tynrai bala buh la sat da u mynbarim bad khamtam ka jingriewspah ki riam tynrai, ki jingshad bad kumjuh ruh ka bam ka dih tynrai.
Ha katei ka tamasa la wan ruh ban pynshit pynshngaiñ da u Bah Bah Mayral Born Syiem MLA ka Nongpoh, kum u kongsan haka jingdonlang u Acting Sirdar ka Elaka Nongpoh Sirdarship u Bah Luistar Lyngdoh, u Lyngdoh ka Raid Nongpoh u Bah Linus Lyngdoh, ki Longsan ki Mansan, ki nongialam sengbhalang, ki nongïalam shnong bad kiwei kiwei ki riew rangbah ka thaiñ Nongpoh.
Haba ai jingkren ha katei ka sngi, u Bah Linus Lyngdoh kum u Lyngdoh Raid u la pynpaw ba ka Shad Sajer ka dei kawei na ki jinglehniam tynrai jong ki mynbarim, kaba la leh kum ka dak jingïaroh bad jingainguh ïa u Blei halor ki jingkyrkhu ha ka rep ka riang, ki soh ki pai bad ki jingthung jingtep.
U la ong ruh ba watla hadien ka jingkylla niam jong kiba bun ki paidbah sha ka niam Khristan, kine ki jinglehniam tynrai kim shym la bteng shuh kumba ju long mynshwa, hynrei ka Shad Sajer ka dang bteng ban pynlong kum ka bynta ban pynneh pynsah ïa ka riti ka dustur, ka kolshor bad ka riam tynrai.
Shuh shuh, u la bynrap ba ka jingpynlong ïa kane ka shad ka long ruh ban pynkynmaw ïa ki pateng ban wan ba kin tip bad kin ym klet ïa ka tynrai jong ka Raid Nongpoh, bad ban burom ïa ki jingïathuh khana jingbuh jingsat jong ki mynbarim.
U Bah Mayral Born Syiem haba kren ha kane ka sngi u la ai ka jingïaroh ïaka Raid Nongpoh kiba la don ka bynta kaba khraw ban pynneh ïaka riti ka dustur, ha kaba ngin sarong ïaka jong lajong bad thymmei kaba mih bad ban burom ïaka jong kiwei.
Haba phai sha ki raid bapher bapher ngi ioh ba bun ki la sdang ban klet ïala ka jong ka tynrai, la ka long haka ktien ka thylliej, ka riam ka beit bad ka riti ka dustur, ka jingwan jong ka saian bad tekhnology kala wanrah shibun ki jingkylla hynrei ngi dei ban ïaid ryngkat ryngkat bad ka jingstad ba kum ki khun ki hajar ngim dei ban klet ïala ka tynrai kaba ngi wan bad ka riti ka dustur kaba ngi dang bud bad pynneh.
Shuh shuh u la ong ruh ba la mang ruh haduh 5 klur ban pynpoi ïa u surok rong haduh lum Wortoh ryngkat kiwei kiwei ki kam pynroi naka tnad jngohkai pyrthei kum ka jingshna ïaka jaka shad bad jaka shong kaba paka bad kaba neh ban lait na u slap bad ka ktieh.