Watla treikam ka CUET hynrei kam dei ban ktah ïa ka Reservation Policy -Ong ka KSU-NEHU

Shillong, Jylliew 14 : Ki nongïalam jong ka KSU NEHU ha ka sngi Ba-ar ki la ong ba lada treikam ne ym treikam ka Common University Entrance Test na ka bynta ban rung klas ha skulbah North Eastern Hills University, kum ka seng ki samla pule ki kwah ban pyntikna ba kam dei satia ban ktah ïa ka Reservation Policy.
“Ha ka por ba don ka COVID haba ngim ïoh ban leit ban thoh entrance exam ki peit katkum ka jingpass bha bad ki ai kyrpang ïa ki samla ba pass na ki jaka ba peit ka NEHU ba kin kyrpang ïa ka 10 persen ki mark. Halor kine ruh ngi la ïakren ba ym dei satia ban pynkhih watla ka don ka CUET ruh,” ong u samla Banlumlang Rani President ka KSU NEHU haba kren bad ki lad pathai khubor ha Shillong Press Club.
Katkum ka jingong jong u, ha u snem ba la dep katkum ka Reservation Policy, ka long beit 50:50 kaba mut mar shiteng hapdeng ki Scheduled Tribe bad kiwei. La ong ruh ba na bynta ki riewlum jong ka Meghalaya pat ki don kyrpang 5persen ne 7 persen na ka bynta kito kiba wan na ki jaka ba kham sahdien.
Na ka liang utei u samla u ong ruh ba ki kwah ban pynshai ba kito ki samla pule kiba kwah ban leh ïa ka Post Graduate ne ka Under Graduate ha ki tnad kiba hap hapoh NEHU kum ka Law bad ka B.Tech ki hap ban leh ïa ka CUET kaba long katkum ka jingbthah na ka sorkar pdeng.
U Samla Banlumlang Rani u ong ruh ba ki samla pule mynta ki dang ïoh por sa kumba 4 sngi ban register ïalade na ka bynta ka entrance test kaban kut ha ka 18tarik.
“Haba don kane (CUET) ka don ka jingduhnong bad ka don ruh ka jingïohnong ngim lah ban len ïa kata namar ngi don Banaras University, ngi don ka JNU ha kaba bun ka bhah jong ki Scheduled Tribe la shu sepei kai bad shong thylli. Kumta da ka jingdon kane, ki samla Khasi kiba lah ban leh bha ki lah ban bteng ïa ki jingpule ha kitei ki skulbah ba paw ha ka Ri India kum ha JNU bad Banaras University,” u la bynrap biang.