Shillong, Jymmang 07: Ki nongsiat suloi jong ka jylla kiba hap hapoh ka Shooting Association of Meghalaya kila lah ban ïalehkai bha bad kiew shaphrang ha kane ka jait jingïalehkai ïa kaba la sakhi na ka lympung ïalehkai Meghalaya Games kaba dang shu kut ha ka sngi Thohdieng hynrei kila ïalehkai bha watla kila shah pynthut ha ka khlam jingpang Covi-19 kumba long lem kiwei pat ki nongïalehkai.
Ka jingïalehkai siat suloi la pynlong shi bynta ka 7th State Championship. Ïa kane ka jingïalehkai la pynlong ha indoor and outdoor range jong ka Assam Regimental Centre kaba don ha Happy Valley.
“Kane kadei ka championship kaba nyngkong hadien ka jingshah pynthut ha ka khlam jingpang Covid-19 bad nga ngeit skhem ba phi la lah ban wanphai bad kiew shaphrang,” ong u Bah John F Kharshiing President ka SAM bad Working President ka Meghalaya State Olympic Association (MSOA) hadien bala kut ka lympung ïalehkai Meghalaya Games.
“Da ka jingkyrshan jong ka Assam Regimental Centre, ngi kyrmen shem ba ka Meghalaya kan lah ban ïalehkai bha ha ka North East Olympic Games,” u la bynrap. Ka NE Games kan sa long ha nongbah Shillong mynta u snem.
Ka North East Small Finance Bank kala ai jingïarap da ka rifle ïa ka SAM, ïa kaba la aiti ha ka sngi plie pyrda ïa ka lympung ïalehkai Meghalaya Games ha ka sngi Ba-ar. Kine ki rifle kadei kaba wanrah na shabar bad bala shna da u Walther kaba kot da ki lak tyngka.
“Ngi da sngewnguh shi katdei eh ïa ka NESFB kaba la ai jingïarap ïa ki rifle,” ong u Bah Kharshiing. “Kane kadei ka jait jingïalehkai kaba rem dor tam bad na bynta ka SAM ban don la ki jong ki rifle kan ïarap shibun na bynta ban nang kyntiew shuh shuh ïa ka jingïalehkai. Ngi kyrmen skhem ruh ban don la ka jong ka jaka ïalehkai ïasiat ha kawei ka sngi.”
Ha ka sngi kut jong ka jingïalehkai la sakhi lang u Brig DCS Kanyal kum u kongsan. U la ong ba ki dang don shibun ki nongïalehkai kiba don ka sap ha ka jylla Meghalaya bad ruh ha ka thaiñ North East bad kyrkhu kyrdoh ruh ïa ki nongïalehkai, SAM bad ïa ka MSOA ba kin nang kiew shaphrang.
U Bah John Kharshiing u la ïroh ruh ïa u General Secretary ka SAM u Neil Sootinck, da kaba ong ba u dei u rishot ba radbah jong ka synjuk ban pynlong ïa kane ka jingïalehkai.
